Katta yettilik davlatlari Ukrainaga 2022-yilgi mamlakat byudjetini qoplash uchun 32,7 milliard dollar ajratdi. Bu haqda G7 mamlakatlari moliya vazirlari qo‘shma bayonotida ma’lum qilindi.
“Hozirda bu summaning hammasi Ukrainaga berilgan yoki o‘tkazish jarayonida. Ushbu yordam bilan Ukraina asosiy davlat funksiyalarini bajarishda davom etdi”, — deyiladi hujjat matnida.
G7 davlatlariga ko‘ra, yuqoridagi summa harbiy, gumanitar va eksportni qo‘llab-quvvatlash uchun qo‘shimcha hisoblanadi.
Yevropa tiklanish va taraqqiyot banki, Xalqaro moliya korporatsiyasi va Yevropa investitsiya banki Ukraina hukumati, davlat korxonalari va xususiy sektorni qo‘llab-quvvatlash uchun qo‘shimcha 6,7 milliard dollar ajratdi, deyiladi bayonotda.
“2023-yil uchun biz Ukrainaga 32 milliard dollargacha byudjet va iqtisodiy yordamni safarbar qildik. Qo‘llab-quvvatlashni yanada rivojlantirishda davom etamiz”, — deydi G7 moliya vazirlari.
Hujjatga ko‘ra, bu summaga quyidagilar kiradi: Yevropa Ittifoqi tomonidan taqdim etilgan 18 milliard dollar, AQSHdan “sezilarli qo‘llab-quvvatlash paketi”, 500 million dollar Jahon banki qo‘shimcha kreditlari va Rossiya va Belarus tovarlari bo‘yicha bojlardan tushgan 115 million Kanada dollari (taxminan 84 million dollar).
20-dekabr kuni AQSH Kongressiga 2023-moliya yili uchun 1,7 trillion dollarlik budjet loyihasi taqdim etildi. Unda Ukraina va NATO ittifoqchilariga yordam uchun 44,9 milliard dollar ajratish nazarda tutilgan — rekord ko‘rsatkich.
Bu mablag‘ning 14,5 milliard dollari Ukraina Qurolli kuchlari uchun harbiy texnikaga, 13 milliard dollari esa iqtisodiy va budjet yordamiga yo‘naltiriladi.
Xalqaro valyuta jamg‘armasi Ukrainani qayta tiklash uchun oyiga 5 milliard dollar talab qilishi mumkin, deb hisoblaydi.
Ukraina hukumati 2023-yilda budjet xarajatlari daromadlardan ikki baravar oshib ketishini ma’lum qilgan. 25-oktabr kuni Ukraina prezidenti Vladimir Zelenskiy Yevropa Ittifoqi rahbarlaridan 2023-yilda 38 milliard dollarlik budjet kamomadini qoplashni so‘ragan.
Izoh (0)