АҚШнинг етакчи банклари инвестиция банки ва савдо операцияларидан тушган паст даромадлар туфайли ходимлар учун йиллик бонусларни қисқартиришга мажбур. Бу ҳақда The Wall Street Journal нашри ёзмоқда.
Даромаднинг пасайиши фонд бозоридаги умумий пасайиш, акциялар ва облигацияларнинг янги жойлаштирилиши фонида юз берди.
Ҳисоб-китобларга кўра, энг йирик банкларнинг қимматли қоғозларни жойлаштириш тўловлари ҳамда қўшилиш ва қўшиб олиш бўйича воситачилик хизматларидан тушган умумий даромади йил давомида тахминан 50 миллиард долларга камайди.
Банклардаги манбаларга таяниб, WSJ хабар беришича, JP Morgan Chase, Bank of America, Citigroup ва Jefferies Financial Group ходимлар учун бонус пулини 30 фоизга, Goldman Sachs инвестиция банки эса 40 фоизга камайтирди.
Goldman Sachs раҳбари Дэвид Соломон, шунингдек, даромадларнинг пасайиши фонида банк келаси йилнинг бошида ишчи кучини қисқартириши мумкинлигини айтди.
АҚШ ОАВ манбаларининг таҳмин қилишича, қисқартириш инвестиция банки ходимларининг 8 фоизига ёки 4 мингга яқин ходимига таъсир қилиши мумкин.
АҚШда бу йил йирик банклар ходимлари учун қанча бонус берилиши ҳақида маълумот йўқ. Ўтган йили Нью-Йорк штат бухгалтерия бошқармаси АҚШнинг йирик банкларида қимматли қоғозлар соҳасида ишлайдиган ходимлар учун ўртача йиллик мукофот рекорд даражадаги 257 500 долларни ташкил этганини маълум қилганди.
Изоҳ (0)