Кремль Санкт-Петербургдаги норасмий учрашувда МДҲ мамлакатлари етакчиларига ҳадя қилинган узуклар юзасидан изоҳ берди.
Россия президенти матбуот котиби Дмитрий Песков улар шунчаки Янги йил муносабати билан эсдалик совғалари бўлганини айтди. Унинг сўзларига кўра, Владимир Путин узукни тақиб юрмоқчи эмас.
«Узукларга урғу бериш керак эмас, бу шунчаки оддий Янги йил сувенири, бунинг ҳеч қизиқ жойи йўқ», — деди Песков матбуот анжуманида.
Эслатиб ўтамиз, Санкт-Петербургдаги норасмий саммитда МДҲ мамлакатлари вакилларига Янги йил табриклари ёзилган узуклар совға қилингани ҳақида Беларусь президенти Александр Лукашенкога яқин бўлган «Пул Первого» Telegram-канали хабар берган эди.
Узукнинг ўртасига МДҲ рамзи туширилган, ички қисмига эса катта ҳарфлар билан «Янги 2023 йил муборак» деган табрик ёзилган. Шунингдек, узукда саммит ўтказилган мамлакат — Россия номини ҳам кўриш мумкин.
Ушбу Telegram-каналда Лукашенко узукни тақиб олгани акс этган сурат эълон қилинган. Аммо МДҲ саммитининг бошқа иштирокчилари қўлида узук кўринмаган.
26—27 декабрь кунлари Санкт-Петербургдаги учрашувда Ҳамдўстликнинг еттита мамлакати — Озарбайжон, Беларусь, Қозоғистон, Қирғизистон, Тожикистон, Туркманистон ва Ўзбекистон президентлари Илҳом Алиев, Александр Лукашенко, Қосим-Жўмарт Тўқаев, Садир Жапаров, Эмомали Раҳмон, Сердар Бердимуҳамедов ва Шавкат Мирзиёев, шунингдек, Арманистон бош вазири Никол Пашинян иштирок этди.
Мавзуга доир:
Изоҳ (0)