Rossiya prezidenti Vladimir Putin Sankt-Peterburgda MDH norasmiy sammiti ochilishida Hamdo‘stlik mamlakatlari hamkorligining asosiy yo‘nalishi mintaqada xavfsizlik va barqarorlikni saqlashdan iborat ekanini aytdi. U ushbu sohada chaqiriqlar va tahdidlar o‘sganini, shuningdek, MDHda ziddiyatlar yuzaga kelganini tan oldi.
“Hamdo‘stlikka a’zo mamlakatlar orasida ham kelishmovchiliklar paydo bo‘layotganini e’tirof etishga to‘g‘ri keladi, afsuski. Lekin asosiysi shuki, biz hamkorlikka qilishga tayyormiz va shunday qilamiz ham”, — dedi Rossiya prezidenti. Uning ta’kidlashicha, Yevrosiyo mintaqasida xavfsizlik va barqarorlikka nisbatan tahdidlar yildan-yilga o‘sib bormoqda, “birinchi navbatda tashqaridan”.
Putin qayd etishicha, muammoli masalalar yuzaga kelgan taqdirda ham, MDHga a’zo mamlakatlar “bir-biriga o‘rtoqlarcha yordam berish va vositachilik qilish orqali, o‘zlari, birgalikda yechishga intilmoqda”.
Rossiya prezidenti aytishicha, Hamdo‘stlik mamlakatlari terrorizm va ekstremizm, transchegaraviy jinoyatchilik, noqonuniy narkotiklar aylanmasi va korrupsiyaga qarshi kurash sohalarida shunday hamkorlik olib bormoqda. Uning qo‘shimcha qilishicha, o‘tib ketayotgan yilda MDH mamlakatlari milliy xavfsizlik organlari va maxsus xizmatlari o‘rtasida tezkor aloqalar saqlanib turibdi.
Joriy yilda MDHga a’zo mamlakatlar o‘rtasida bir qator qurolli to‘qnashuvlar yuz berdi. Xususan, 13-sentabrga o‘tar kechasi Armaniston va Ozarbayjon chegarasida, 14-sentabr kuni esa Qirg‘iziston va Tojikiston chegarasida jangovar to‘qnashuvlar qayta boshlandi. Dekabr boshida Ozarbayjon tomoni Armaniston va Tog‘li Qorabog‘ni bog‘lab turuvchi yagona yo‘l — Lochin yo‘lagini to‘sib qo‘ydi, bu esa Armaniston hukumatining ushbu mintaqaga joylashtirilgan Rossiya tinchlikparvarlariga nisbatan tanqidiga sabab bo‘ldi.
Sankt-Peterburgdagi uchrashuvda Hamdo‘stlikning yettita mamlakati — Ozarbayjon, Belarus, Qozog‘iston, Qirg‘iziston, Tojikiston, Turkmaniston va O‘zbekiston prezidentlari Ilhom Aliyev, Aleksandr Lukashenko, Qosim-Jo‘mart To‘qayev, Sadir Japarov, Emomali Rahmon, Serdar Berdimuhamedov va Shavkat Mirziyoyev, shuningdek, Armaniston bosh vaziri Nikol Pashinyan ishtirok etmoqda.
Izoh (0)