АҚШ бўйлаб давом этаётган қор бўрони оқибатида камида 23 киши ҳалок бўлди, деб хабар бермоқда NBC. Аввалроқ 9 қурбон ҳақида хабар берилганди.
Мичиган штати, Бат шаҳарчасидаги қариялар уйи атрофида 82 ёшли аёл қор остидан ўлик ҳолда топилди, деб хабар беради маҳаллий полиция.
Колорадо штатининг Денвер шаҳри маъмурлари 22 декабрь кунидан бери икки киши об-ҳаво таъсиридан вафот этганини айтди. Ўлимнинг якуний сабаби Денвер тиббий экспертизаси идораси томонидан аниқланмоқда.
Небраска штати патрули об-ҳаво билан боғлиқ ҳолда бир кишининг ўлимини тасдиқлади. Қўшимча тафсилотлар ҳозирча ошкор этилмаган. Идора вакили об-ҳаво билан боғлиқ 600 дан ортиқ ҳодисалар ҳақида хабар олганини айтди.
Оклахома ва Висконсин штатларида ҳам об-ҳаво билан боғлиқ ўлим ҳолатлари қайд этилган.
CNN ёзишича, ноқулай об-ҳаво шароитида ҳалок бўлганлар ҳақидаги маълумотлар 21 декабрь, чоршанба кунидан буён келиб тушмоқда, бўрон 23 декабрь куни авжига чиққан.
Бундан ташқари, мамлакатда электр энергияси билан боғлиқ узилишлар бошланди. Электр узатилишини кузатиб борувчи «PowerOutage.us» сайти маълумотларига кўра, 1 миллион истеъмолчи чироқсиз қолган вазиятлар ҳам бўлди. Сўнгги маълумотларга қараганда, 500 мингдан ортиқ аҳоли электр энергияси билан боғлиқ муаммоларни бошидан кечирмоқда, шуларнинг ярмидан кўпи — шарқий Мен штати аҳолисидир.
Flightaware портали маълумотларига кўра, сўнгги икки кун ичида АҚШда 7,3 мингдан ортиқ рейслар бекор қилинган.
Изоҳ (0)