Qirg‘iziston Tashqi ishlar vazirligi mamlakat fuqarolarini Tojikistonga bormaslikka chaqirdi. Bu haqda AKIpress xabar berdi.
Vazirlik holat yuzasidan 22-dekabr kuni aholiga murojaat qildi. Unda qirg‘izistonliklarning Tojikistonga kirishini cheklash choralari davom etayotgani keltirib o‘tilgan. Shu munosabat bilan Tashqi ishlar vazirligi qirg‘iz xalqidan Tojikistonga har qanday sayohatlardan tiyilishni yoki Tojikiston orqali tranzitni amalga oshirmaslikni so‘ramoqda.
Oktabr oyida ham qirg‘izistonliklarga Tojikistonga bormaslik so‘ralgandi. Bunga Tojikistonda Dushanbe xalqaro aeroportidagi nazorat-o‘tkazish punktida Qirg‘iziston fuqarolarining kirishi asossiz cheklanishi sabab bo‘lgan.
Tojikiston hududida qirg‘izlarning huquqlari buzilgan yoki ularga nisbatan noxolis qarashlar namoyon bo‘lgan taqdirda, Qirg‘iziston TIV Konsullik boshqarmasiga murojaat qilish so‘ralgan.
Ma’lumot o‘rnida, noyabr oyida Qirg‘izistonning chegaraga yaqin aholisiga vatan himoyasi uchun qurol ishlatishga ruxsat berilishi haqida xabar berilgan.
3-dekabr kuni Tojikiston va Qirg‘iziston fuqarolari o‘rtasida chegarada janjal sodir bo‘ldi. Qirg‘iziston fuqarolari Tojikistonning Chorkuh jamoati Somoniyon qishlog‘i fuqarosini armatura bilan do‘pposlagan. Shundan keyin qirg‘izistonlik chegarachilar Tojikiston tomoniga qarata bir necha marta o‘q uzgan. Jabrlanuvchi kasalxonaga yotqizilgan.
Qirg‘iziston tomoni janjal “Qirg‘iziston fuqarosi M.N. va Tojikiston fuqarolari o‘rtasidagi dahanaki jang”dan keyin boshlanganini bildirgan.
Izoh (0)