Ukrainadagi urushda ishtirok etayotgan Rossiyaning “Vagner” guruhi Shimoliy Koreyadan qurol-yarog‘ sotib oldi. Bu haqda Reuters agentligiga AQSHning yuqori martabali mulozimi ma’lum qildi.
Manbaning ta’kidlashicha, “Vagner” xususiy harbiy kompaniyasining Ukrainadagi urushdagi roli ortib bormoqda. Kreml tomonidan nazorat qilinadigan harbiy kompaniya yangi qurollar uchun pul to‘lagan, xususan, KXDR vagnerlarga raketa va snaryadlar yuborgan.
“Shimoliy Koreya ‘Vagner’ga dastlabki qurol-yarog‘ yetkazib berishni yakunladi, buning uchun guruh pul to‘lagan. O‘tgan oy KXDR Rossiyaga raketa va snaryadlarni yetkazib berdi”, — deydi rasmiy jurnalistlarga.
Manba AQSH keyinroq e’lon qilinadigan razvedka ma’lumotlariga asoslanib, baho berishini bildirdi. Vashingtonning fikricha, Shimoliy Koreya tomonidan yetkazilgan o‘q-dorilar miqdori Ukrainadagi jangovar harakatlar dinamikasini o‘zgartirmaydi.
“Ammo Shimoliy Koreya ‘Vagner’ga ko‘proq harbiy texnika yetkazib berishni rejalashtirayotganidan xavotirdamiz”, — dedi manba.
AQSH rasmiylari Shimoliy Koreyaning qurol savdosi BMT Xavfsizlik Kengashi rezolyutsiyalarini to’g‘ridan-to‘g‘ri buzish deb hisoblaydi va bu masalani Xavfsizlik Kengashida muhokama qilishni rejalashtirmoqda.
Noyabr oyida Shimoliy Koreya Rossiyaga hech qachon qurol eksport qilmagani va bunday qilishni rejalashtirmayotgani haqida ma’lum qilgandi. KXDR Rossiyada o‘q-dorilar taqchilligi sharoitida unga artilleriya snaryadlarini yashirincha yetkazib berayotganini Oq uy Milliy xavfsizlik kengashining strategik aloqalar bo‘yicha koordinatori Jon Kirbi aytgandi.
Izoh (0)