Polsha Ukrainaga harbiy ko‘mak berishda davom etadi, raketa qulab tushishi bilan bog‘liq vaziyat respublika hukumatining pozitsiyasini o‘zgartirmaydi. Bu haqda Polshaning BMTdagi vakili Kshishtof Shcherskiy Xavfsizlik kengashi majlisida aytib o‘tdi, deb yozadi “RBK”.
“Joriy vaziyat bizning yondashuvimizni o‘zgartirmaydi. Polsha Ukrainani qo‘llab-quvvatlashni davom ettirish zarur deb hisoblaydi. Polsha buni jangovar harakatlarning eng boshidan buyon amalga oshirib kelmoqda”, — dedi Shcherskiy.
15-noyabr kuni Polsha OAVlari Ukraina bilan chegara yaqinidagi Lyublinsk viloyatining Pshevoduv qishlog‘iga ikkita raketa qulagani haqida xabar berdi. Raketalardan biri elevatorga kelib tushdi, oqibatda ikki kishi halok bo‘ldi. Shu kuni Rossiya Ukraina hududiga yoppasiga raketa zarbasi bergandi.
Ukraina hukumati Polshadagi hodisada Rossiyani javobgar qildi. Moskva ayblovlarni rad etmoqda. G‘arb mamlakatlari va Polsha hukumati raketa Ukrainaga tegishli bo‘lgani haqidagi versiyaga moyillik bildirmoqda. Polsha prezidenti Anjey Duda “baxtsiz hodisa” yuz berganini taxmin qildi. Uning so‘zlariga ko‘ra, katta ehtimol bilan, qulagan raketa Ukraina havo hujumiga qarshi mudofaasi tomonidan qo‘llanilgan.
AQSH, Germaniya va Buyuk Britaniya ham Polsha raketa qulashi bilan bog‘liq hodisa uchun yakunda Ukraina bilan urush boshlagan va mamlakat fuqarolik infratuzilmasini o‘qqa tutgan Rossiya mas’ul ekanligi haqidagi bayonotlar bilan chiqdi.
Izoh (0)