“Daryo” nashri 22-dekabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Nima uchun Gretsiya Belarusdan keladigan samolyotlar uchun o‘z havo hududini yopmoqda?
Gretsiya Belarusdan keladigan samolyotlar uchun o‘z havo hududini yopdi va milliy aviatashuvchilariga Belarusga parvozlarni taqiqladi. Bu haqda Pentapostagma nashri Gretsiya fuqaro aviatsiyasi boshqarmasi (HCAA) bayonotiga tayanib xabar berdi.
Belarus samolyotlariga “Gretsiya respublikasi hududiga qo‘nish, undan ko‘tarilish yoki uning ustidan uchib o‘tish taqiqlanadi”. Favqulodda vaziyatlar, shuningdek, gumanitar va tibbiy samolyotlar uchun istisno mavjud.
Jurnalistlarning tushuntirishicha, Gretsiya rasmiylarining qarori Belarusning Ukrainadagi urushda ishtirok etishi mumkinligi haqidagi xavotirlar bilan bog‘liq. Belarus Minsk Ukrainadagi mojaroda ishtirok etish niyatida emasligini bir necha bor ta’kidlagan.
Ammo so‘nggi oylarda mamlakatda Rossiya jangchilari va qurollari, jumladan, tanklar va bronetransportyorlardan iborat mintaqaviy qo‘shinlar guruhi joylashtirildi. 20-dekabr kuni Moskva va Minsk yagona mudofaa maydonini yaratishga kelishib oldi. Ayni vaziyatda CNN jurnalistlari xabar berishicha sun’iy yo'ldoshdan Rossiya Arktikadagi harbiy bazalarini kuchaytirayotgani aniqlangan.
Zelenskiy AQSHga tashrifdan ko‘zlagan maqsadlariga erisha olmadimi?
Ukraina prezidenti Vladimir Zelenskiy AQSHga tashrifidan ko‘zlangan maqsadga erisha olmadi, u hujum operatsiyalarini olib borish uchun zamonaviyroq qurol-yarog‘lar olishni rejalashtirgan edi. The Washington Post gazetasida e’lon qilingan maqolada shunday fikrlar bildirildi.
Nashr fikricha, ikki davlat rahbarining muzokaralardan ko‘zlagan maqsadlari turlicha bo‘lgan. Xususan, Zelenskiyning maqsadi kelasi yilda “Ukrainaning yirik hujum operatsiyalarini boshlash qobiliyatini oshirish uchun yanada kuchliroq qurol-yarog‘”ni qo‘lga kirishdan iborat bo‘lgan. “Hech bo‘lmaganda, qisqa muddatli istiqbolda u bunga erisha olganidan darak beruvchi belgilar deyarli ko‘rinmadi”, — deb ta’kidlaydi maqola mualliflari.
O‘z navbatida, Vashington ma’muriyati Zelenskiy “diplomatiya haqida qanday fikrda ekani bo‘yicha muhokamalar”ni sabrsizlik bilan kutgan, bu haqda gazetaga Oq uydagi manbasi ma’lum qilgan. “U hozir qaysi bosqichda turgani, muzokaralar jarayonini tezlashtirish mumkin bo‘lishi uchun Kiyev maksimal darajada kuchli pozitsiyada turganiga ishonch hosil qilish uchun unga nima kerakligi — shularni muhokama qilishni ko‘zlagan”, — deya qo‘shib qo‘ydi nashr manbasi.Zelenskiyning o‘zi esa Ukrainaga “ajoyib yangiliklar” bilan qaytayotganini ma’lum qildi.
Shuningdek, Zelenskiy AQSH Kongressi 45 milliard dollarlik yordam paketini uning tarkibidan qat’iy nazar qo‘llab-quvvatlashiga umid bildirgan. Prezident Ukrainaning vazifasi — mamlakat infratuzilmasiga nisbatan davom etayotgan zarbalar fonida qishdan o‘tib olish ekanini aytgan.
Tog‘li Qorabog‘da Rossiya tinchlikparvar kuchlari o‘z vazifasini bajarmaganlikda ayblanmoqda
Armaniston bosh vaziri Nikol Pashinyan Ozarbayjon tomonidan Lochin yo‘lagi yopib qo‘yilgani sabab Tog‘li Qorabog‘da og‘ir gumanitar vaziyat yuzaga kelganini ma’lum qildi. Uning so‘zlariga ko‘ra, Armanistonni Qorabog‘ hududi bilan bog‘laydigan yagona yo‘lning to‘sib qo‘yilishi ortidan u yerda oziq-ovqat muammosi boshlangan.
“Bokuning harakatlari noqonuniydir va xalqaro majburiyatlarni, xususan, 2020-yil 9-noyabrdagi uch tomonlama bayonot qoidalarini buzadi”, — dedi Pashinyan Armaniston Vazirlar Mahkamasi majlisida.
Armaniston bosh vaziri, shuningdek, Rossiya tinchlikparvar korpusi kuchlarini o‘z majburiyatlarini bajarmayotgani uchun tanqid qildi. “Albatta, bu Ozarbayjonning harakatlari bilan bog‘liq, ammo bu masalaning mohiyatini o‘zgartirmaydi. Rossiya tinchlikparvar kuchlarining u yerda bo‘lishidan asosiy maqsad — noqonuniy harakatlarga yo‘l qo‘ymaslik va Lochin yo‘lagini nazorat ostida ushlab turish”, — degan bosh vazir.
3-dekabr kuni Tog‘li Qorabog‘ vakillari Ozarbayjon harbiylari respublika poytaxti Stepanakertni Armaniston bilan bog‘lovchi Lochin yo‘lagini to‘sib qo‘yganini ma’lum qildi. Rossiya tinchlikparvar kuchlari avtomagistralni ochish uchun muzokaralarga kirishishi kerak edi. 12-dekabr kuni Ozarbayjon fuqarolarining Ozarbayjon nazorati zonasidan tashqaridagi konda qazib olingan rudani mintaqadan eksport qilishni to‘xtatishni talab qiluvchi noroziligi tufayli Lochin yo‘lagi transport harakati uchun yopildi.
13-dekabr kuni Ozarbayjon Armanistondan Tog‘li Qorabog‘ga gaz yetkazib berilishini to‘xtatdi.
O‘zbekistonda qisqartiriladigan vazirliklar uchun takliflar berila boshladi
Iqtisodchi Abdulla Abduqodirov “Daryo” muxbiriga bergan intervyusida ayrim vazirlik va idoralarni qisqartirish hamda birlashtirib yuborish masalasida fikr bildirdi.
“G‘aznachilikni Moliya vazirligidan alohida chiqarib, Davlat soliq qo‘mitasi va Davlat bojxona qo‘mitasi bilan birlashtirib yuborish kerak. Iqtisodiyot vazirligi bilan Moliya vazirligini ham birlashtirsa bo‘ladi.
Investitsiyalar va tashqi savdo vazirligini Investitsiyalar va sanoat vazirligiga aylantirish lozim. Chunki sanoat siyosati yaqqol ko‘rinmayapti. Tog‘-kon sanoatida qilinayotgan katta ishlarga prezident ham e’tibor berdi. Nima uchun bu ishlarni qilyapmiz? Xo‘p, misni ishlab chiqaraylik. Keyin uni nima qilamiz, mahsulotni qayta ishlash masalasi ham bo‘ladimi yoki yo‘q? Sanoat siyosati bugun biz uchun juda dolzarb masala. Lekin uni investitsiyadan tashqari holda ko‘rish imkoniyati yo‘q.
Shu bilan birga, bugun ijtimoiy himoyaga javob beradigan vazirlik ham kerak. To‘g‘ri, bunday vazirlik bir paytlar bo‘lgandi. Menimcha, Mehnat vazirligi bilan ijtimoiy himoya vazirligini bitta qilib tashkil etish mumkin. U kambag‘allikni qisqartirishga ham javob berishi kerak”, — deydi iqtisodchi.
Avvalroq prezident Shavkat Mirziyoyev O‘zbekistonda vazirlik va idoralar soni hozirgi 61 tadan 28 tagacha kamaytirilishini, davlat xizmatchilari soni ham bosqichma-bosqich 25-30 foizga qisqarishini aytgandi.
Izoh (0)