Namangan viloyati hokimligida yo‘l harakati xavfsizligini ta’minlash, haydovchilar va yo‘lovchilar uchun munosib sharoitlar yaratishga bag‘ishlangan muhokama yig‘ilishi o‘tkazildi. Bu haqda Daryo muxbiri Azizbek Abduvaliyev xabar bermoqda.
Yig‘ilishda maxsus ekspluatatsiya-montaj bo‘limlari, yo‘llardan foydalanish boshqarmasi tomonidan amalga oshirilgan ishlar tanqidiy tahlil etildi.
“Tumanli kunlarda yo‘l chiziqlari ko‘rinmay qoldi va bu ijtimoiy tarmoqlarda haqli e’tirozlarga sabab bo‘ldi. Bunday holatlarning oldini olish uchun fosforli bo‘yoqlardan foydalanish mumkin edi. Yo‘llarda innovatsion yechimlarni qo‘llash vaqti allaqachon kelgan”, — dedi viloyat hokimi Shavkat Abdurazzaqov.
Mutasaddilarning Namangan shahri va tumanlar markazlarida tirbandliklarning oldini olish bo‘yicha takliflari ko‘rib chiqildi. Unda ayrim to‘silgan ko‘chalarni ochish, bir tomonlama harakat tamoyilini rivojlantirish masalalari ilgari surildi. Bu borada rivojlangan xorijiy davlatlar tajribasi asosida ish olib boriladi.
Yig‘ilishda viloyatda jamoat transporti tizimini kengaytirish, avtobuslar yo‘nalishlarini ko‘paytirish masalalari ham muhokama etildi.
“Davlat rahbari Oliy Majlisga murojaatnomada avtobuslar sonini ko‘paytirish, ular uchun alohida yo‘laklar ajratishga e’tibor qaratganlari bejiz emas. Namanganga ham kelgusi yili 100 tadan kam bo‘lmagan miqdorda zamonaviy avtobuslar olib kelamiz va doimiy qatnovini yo‘lga qo‘yamiz”, — dedi Shavkat Abdurazaqov.
Ma’lumot uchun, bugungi kunda Namangan viloyati jamoat transporti tizimida jami 344 ta avtobus va 30 ta mikroavtobus mavjud.
Mavzuga doir:
- Prezident: “Toshkent shahri uchun qo‘shimcha mingta zamonaviy avtobus sotib olinadi, 7 ta yer usti metro bekati ishga tushiriladi”
- “Metan tanqisligi sabab yo‘lkira narxlari ikki baravarga oshdi”. Namangan va Qashqadaryoda yo‘lovchilar yo‘lkira oshganini aytsa, haydovchilar bunga gaz muammosi sabab demoqda
Izoh (0)