“Quyi tizim rahbarlarining e’tiborsizligi davlat rahbarining haqli e’tirozlariga sabab bo‘ldi” — Koson tumani hokimi

Prezident Shavkat Mirziyoyev raisligida 2022-yilning 15-dekabr kuni bo‘lib o‘tgan tadbirkorlik va sanoatni rivojlantirish, aholi bandligini ta’minlash chora-tadbirlari haqidagi videoselektorda Qashqadaryo viloyatining Koson tumanidagi 1,2 ming gektar yerda ekin ekilmagani, tumanda 75 foiz korxonalarda 1 ta ish o‘rni ko‘rsatilgani, bu esa yashirin iqtisodiyotga yo‘l ochgani, doimiy band bo‘lganlar soni kamayganiga e’tibor qaratilib, holat tanqid ostiga olingandi.

“Daryo” muxbiri mazkur tanqid yuzasidan Koson tumani hokimi Asrol Boyqarayevdan izoh oldi.

Ma’lum bo‘lishicha, mazkur yig‘ilishda berilgan topshiriqlar va yo‘l qo‘yilgan kamchiliklar yuzasidan Koson tumani hokimligida mas’ullar ishtirokida muhokama yig‘ilishi o‘tkazilgan.

Bugungi kunda korxona va tashkilotlarda 1 nafardan ishchi ko‘rsatib, soliqqa hisobot topshirgan korxonalar soni Kosonda 610 tani tashkil qilmoqda. Aniqlik kiritilganda, yil boshiga nisbatan ayrim korxona va tashkilotlarda ishchi va xizmatchilar soni yil yakuniga nisbatan keskin kamaytirib yuborilgan va noto‘g‘ri hisobotlar taqdim etilgan. Jumladan, Koson tumani xalq ta’limi bo‘limida yanvar oyida xodimlar soni 6172 nafar deb ko‘rsatilgan bo‘lsa, oktabr oyida tashkilot mas’ul shaxslari tomonidan qo‘yilgan xato tufayli 5582 nafar ishchi bor deyilgan. Xuddi shunday tumandagi kasb-hunar maktablari va texnikum hamda sport maktabida ham xodimlar soni kamaytirib ko‘rsatilgan. Shundan kelib chiqib, xodimlar sonini kamaytirib ko‘rsatgan yoki hisobotlarni vaqtida taqdim etmagan mas’ul shaxslarga intizomiy jazo choralari ko‘riladi, — dedi tuman hokimi Asrol Boyqarayev.

Haqiqatdan ham aholini band qilish masalasi dolzarb. Buning uchun avvalo tadbirkorlik subyektlari sonini ko‘paytirish, ularga imkoniyat va sharoit yaratib berish kerak. O‘rganishlarimiz davomida bu soha bilan ishlovchi mas’ul shaxslar va tadbirkorlar o‘rtasida samarali muloqot yo‘lga qo‘yilmagani aniqlandi. Bu borada biz 2023-yil davomida jami 15725 nafar fuqaroning bandligini ta’minlashni rejalashtirmoqdamiz. Shundan, 53 ta investitsiya loyiha ishga tushirilishi hisobiga 795 nafar fuqaro ishli bo‘lishi kutilmoqda. 2050 nafar fuqaroga dehqon xo‘jaliklari uchun 1800 gektar yer maydoni ajratish hisobiga, yana 1350 nafar fuqaroni 760 ta yangi tashkil etilgan kichik biznes subyektlari orqali ish bilan ta’minlash kutilmoqda, — deydi tuman hokimi.

Bu borada ayni paytda viloyat qishloq xo‘jaligi boshqarmasi boshlig‘i boshchiligida ishchi guruhi tuzilib, tumandagi ekin ekilmagan bo‘sh yer maydonlari o‘rganilmoqda. O‘rganish natijalariga qarab, kamchiliklarga yo‘l qo‘ygan xodimlarga albatta jazo choralari ko‘riladi va jamoatchilikka ma’lum qilinadi. Shu o‘rinda alohida ta’kidlashimiz kerak, prezidentimiz selektorida ko‘tarilgan masalalar Koson tumani rivoji uchun dolzarb va kechiktirib bo‘lmaydigan masaladir. Bu borada kamchiliklarga yo‘l qo‘yganimiz, ayrim quyi tizimdagi rahbarlarning e’tiborsizligi davlat rahbarining haqli e’tirozlariga sabab bo‘ldi. Shundan kelib chiqib, tumandagi har bir rahbar o‘z oldiga muhim vazifalarni belgilab oldi va ayni paytda yuqorida aytilgan 3 ta masala yuzasidan tizimli ish olib borilmoqda, — deydi tuman rahbari.