Uchqo‘rg‘on tumani hokimi: “Yashirin iqtisodiyotga barham berish uchun tadbirkorlar bilan ko‘proq muloqotda bo‘lish kerakligini angladik”
Prezident Shavkat Mirziyoyev rahbarligida 2022-yil 15-dekabr kuni o‘tkazilgan videoselektorda mamlakatda xususiy sektorda faoliyat ko‘rsatayotgan 232 mingta korxonada ishchilar soni bor-yo‘g‘i bir kishidan iborat ekanligi qayd etib o‘tildi. Jumladan, Namangan viloyatining Uchqo‘rg‘on tumanida bunday korxonalar soni 75 foizni tashkil etmoqda. “Daryo” muxbiri Azizbek Abduvaliyev tuman hokimi Jahongir Rizayev bilan uchrashib, selektordan chiqarilgan xulosalar haqida so‘radi.
“Selektorda ko‘rsatilgan kamchiliklarni bartaraf etish maqsadida tuman hokimligida Aholi bandligiga ko‘maklashish, Mahallabay ishlash va tadbirkorlikni rivojlantirish markazlari hamda tuman davlat soliq inspeksiyasi mutaxassislaridan iborat ishchi guruh tuzilib, tadbirkorlarga davlat tomonidan berilgan imtiyozlar haqida keng ko‘lamdagi tushuntirish ishlari olib borish vazifasi yuklatildi.
Tumandagi bir nafar ishchi-xodim ishlayotgan korxona rahbarlarini haftaning har juma kuni bo‘lib o‘tadigan tadbirkorlar bilan uchrashuvlarga taklif qilmoqchimiz. Hududimizdagi monitorlarga esa yashirin iqtisodiyot va uning salbiy oqibatlari haqidagi videolavhalarni joylashtiramiz va muntazam berib boramiz.
Ishchi guruh tumanda chakana savdo, yo‘lovchi va yuk tashish, qishloq xo‘jaligi xizmatlari, mehmonxona, oshxona, IT, avtomobil ta’mirlash kabi faoliyatlar bo‘yicha ijtimoiy soliq stavkasi 12 foizdan 1 foizga tushirilganligi, yoshlar ishga qabul qilinganida 6 oy davomida ijtimoiy soliqdan ozod qilinganligi bo‘yicha targ‘ibot-tashviqot ishlari olib boriladi.
Mavjud korxonalar xatlovdan o‘tkazilib, ish o‘rinlari soliq va statistik hisobotlarda to‘liq aks ettirishga erishishni ko‘zlaganmiz. Bu bilan “konvert” usulida haq to‘lashning oldi olingan bo‘ladi. Yuqorida aytib o‘tganlarim tuzilgan yo‘l xaritasining ma’lum bir yo‘nalishlaridan iborat”, — deydi Jahongir Rizayev.
Ma’lumot uchun, Uchqo‘rg‘on tumanida bugungi kunda qariyb 2 mingta kichik tadbirkorlik subyekti faoliyat ko‘rsatmoqda. Ulardan 261 tasi qishloq xo‘jaligi, 421 tasi sanoat, 171 tasi qurilish, 809 tasi savdo, 57 tasi tashish va saqlash, 103 tasi mehmonxona va ovqatlanish, 29 tasi axborot va aloqa, 31 tasi sog‘liqni saqlash va ijtimoiy xizmatlar ko‘rsatish sohalarida faoliyat ko‘rsatadi, 111 tasi esa boshqa turdagi korxonadan iborat.
