Президент Шавкат Мирзиёев раислигида 2022 йилнинг 15 декабрь куни бўлиб ўтган тадбиркорлик ва саноатни ривожлантириш, аҳоли бандлигини таъминлаш чора-тадбирлари ҳақидаги видеоселекторда Қашқадарё вилоятининг Косон туманидаги 1,2 минг гектар ерда экин экилмагани, туманда 75 фоиз корхоналарда 1 та иш ўрни кўрсатилгани, бу эса яширин иқтисодиётга йўл очгани, доимий банд бўлганлар сони камайганига эътибор қаратилиб, ҳолат танқид остига олинганди.
«Дарё» мухбири мазкур танқид юзасидан Косон тумани ҳокими Асрол Бойқараевдан изоҳ олди.
Маълум бўлишича, мазкур йиғилишда берилган топшириқлар ва йўл қўйилган камчиликлар юзасидан Косон тумани ҳокимлигида масъуллар иштирокида муҳокама йиғилиши ўтказилган.
Бугунги кунда корхона ва ташкилотларда 1 нафардан ишчи кўрсатиб, солиққа ҳисобот топширган корхоналар сони Косонда 610 тани ташкил қилмоқда. Аниқлик киритилганда, йил бошига нисбатан айрим корхона ва ташкилотларда ишчи ва хизматчилар сони йил якунига нисбатан кескин камайтириб юборилган ва нотўғри ҳисоботлар тақдим этилган. Жумладан, Косон тумани халқ таълими бўлимида январь ойида ходимлар сони 6172 нафар деб кўрсатилган бўлса, октябрь ойида ташкилот масъул шахслари томонидан қўйилган хато туфайли 5582 нафар ишчи бор дейилган. Худди шундай тумандаги касб-ҳунар мактаблари ва техникум ҳамда спорт мактабида ҳам ходимлар сони камайтириб кўрсатилган. Шундан келиб чиқиб, ходимлар сонини камайтириб кўрсатган ёки ҳисоботларни вақтида тақдим этмаган масъул шахсларга интизомий жазо чоралари кўрилади, — деди туман ҳокими Асрол Бойқараев.Видеоселекторда Косон туманида доимий банд бўлганлар сони камайгани ҳам танқид қилинган.
Ҳақиқатдан ҳам аҳолини банд қилиш масаласи долзарб. Бунинг учун аввало тадбиркорлик субъектлари сонини кўпайтириш, уларга имконият ва шароит яратиб бериш керак. Ўрганишларимиз давомида бу соҳа билан ишловчи масъул шахслар ва тадбиркорлар ўртасида самарали мулоқот йўлга қўйилмагани аниқланди. Бу борада биз 2023 йил давомида жами 15725 нафар фуқаронинг бандлигини таъминлашни режалаштирмоқдамиз. Шундан, 53 та инвестиция лойиҳа ишга туширилиши ҳисобига 795 нафар фуқаро ишли бўлиши кутилмоқда. 2050 нафар фуқарога деҳқон хўжаликлари учун 1800 гектар ер майдони ажратиш ҳисобига, яна 1350 нафар фуқарони 760 та янги ташкил этилган кичик бизнес субъектлари орқали иш билан таъминлаш кутилмоқда, — дейди туман ҳокими.Президент шунингдек, Косонда 1,2 минг гектар ерларда экин экилмаганини ҳам танқид қилган.
Бу борада айни пайтда вилоят қишлоқ хўжалиги бошқармаси бошлиғи бошчилигида ишчи гуруҳи тузилиб, тумандаги экин экилмаган бўш ер майдонлари ўрганилмоқда. Ўрганиш натижаларига қараб, камчиликларга йўл қўйган ходимларга албатта жазо чоралари кўрилади ва жамоатчиликка маълум қилинади. Шу ўринда алоҳида таъкидлашимиз керак, президентимиз селекторида кўтарилган масалалар Косон тумани ривожи учун долзарб ва кечиктириб бўлмайдиган масаладир. Бу борада камчиликларга йўл қўйганимиз, айрим қуйи тизимдаги раҳбарларнинг эътиборсизлиги давлат раҳбарининг ҳақли эътирозларига сабаб бўлди. Шундан келиб чиқиб, тумандаги ҳар бир раҳбар ўз олдига муҳим вазифаларни белгилаб олди ва айни пайтда юқорида айтилган 3 та масала юзасидан тизимли иш олиб борилмоқда, — дейди туман раҳбари.
Изоҳ (0)