Ijtimoiy tarmoqlarda voyaga yetmagan bola bilan IIO xodimi o‘rtasidagi og‘zaki mojaro aks etgan video tarqalib, turli muhokamalarga sabab bo‘lmoqda. Toshkent shahar IIBB matbuot xizmati holat yuzasidan ma’lumot berdi.
Videoda IIO xodimi bolani tortqilab olib ketishga urinayotgani, unga 199-modda (Ma’muriy javobgarlik to‘g‘risidagi kodeksning 199-moddasi — Maxsus xizmatlarni qasddan aldab chaqirganlik — tahr.) xodimlarning qonuniy talabga bo‘ysunmayotgani haqida gapirgan. Bola esa xodim noqonuniy talab qo‘yayotganini, aytilgan joyga ota-onasi bilan birga borishini bildirgan.
Holatni ikki qiz videoga olgan. Xodimlardan biri videoni ularning ruxsatisiz internetga joylamasliklari kerakligini aytgan.
Poytaxt IIBB matbuot xizmati bergan ma’lumotga ko‘ra, 18-dekabr kuni taxminan soat 14:30 larda voyaga yetmagan, 2007-yilda tug‘ilgan Yu.S. 102 raqamiga qo‘ng‘iroq qilib, Bektemir tumanidagi savdo majmualaridan birida qandolat mahsulotlari xodimlari bilan o‘zaro janjallashgani yuzasidan xabar bergan. Mazkur xabar yuzasidan yetib kelgan tuman IIO FMB PPX xodimlari voyaga yetmagan Yu.S.ga nisbatan qo‘pollik qilgan.
“Toshkent shahar IIBB rahbariyati fuqarolarga nisbatan xodimlar tomonidan qo‘pol muomalada bo‘lish holatlarini qoralaydi. Videodagi holat yuzasidan ichki ishlar organlari xodimlariga nisbatan xizmat tekshiruv tayinlandi, qisqa muddat ichida xizmat tekshiruvi yakunlanib, aybdor xodimlarga nisbatan qat’iy chora ko‘rilishi ta’minlanadi”, — deyiladi xabarda.
Izoh (1)
Бу одам ойдан келганми? УЗИ хам ишонмаса керак айтган су́зларига .Ёлгон гапириб хижолат хам булмади безбет