Prezident Shavkat Mirziyoyev rahbarligida 2022-yil 15-dekabr kuni o‘tkazilgan videoselektorda yaratilgan imkoniyatlarga qaramasdan, ayrim hududlarda aholi bandligini ta’minlash ko‘rsatkichlari yaxshi emasligi ko‘rsatib o‘tildi. Jumladan, 2022-yil davomida doimiy bandlar soni Farg‘ona viloyatining Furqat tumanida ham kamaygan. “Daryo” muxbiri Azizjon Ermatov tuman hokimi Jahongir Jumanov bilan uchrashib, mazkur holatning sabablari va kelgusida aholi bandligini ta’minlash bo‘yicha qilinadigan ishlar haqida so‘radi.
Selektorda ko‘rsatib o‘tilgan kamchiliklarni bartaraf etish, unda ko‘tarilgan asosiy masala — aholini daromadli mehnat bilan band qilish bo‘yicha muhim vazifalarni belgilab oldik. 2022-yilda aholi bandligiga ko‘maklashish, Mahallabay ishlash va tadbirkorlikni rivojlantirish markazlari bilan hamkorlikda 24 mingdan ortiq mavsumiy va doimiy ish o‘rinlari yaratildi.
Tumanda 2023-yil davomida tadbirkorlik, sanoat, qishloq xo‘jaligi, qurilish, transport, kasanachilik, hunarmandchilik, savdo va xizmat ko‘rsatish sohalarida 28 ming 648 nafar fuqaro bandligini ta’minlash ko‘zda tutilgan.
Kelgusi yilda istirohat bog‘i, akvapark ko‘ngilochar maskani, dehqon, buyum hamda qurilish materiallari bozorlari, mehmonxona, xususiy klinikalar, savdo majmualari hamda ishlab chiqarish korxonalari ishga tushiriladi. Ushbu yo‘nalishlarda jami 4 ming 110 nafar ishsiz fuqaroning bandligi ta’minlanadi.
Shuningdek, “Ardaxshon” mahalla fuqarolar yig‘ini hududida texnopark qurilishi hisobiga 1000 nafardan ortiq fuqarolar doimiy ish o‘rniga ega bo‘ladi.
Umuman olganda, kelgusi yil bandlik dasturini to‘liq amalga oshirish natijasida tumanda bandlar sonini sezilarli darajada oshiramiz. Bu orqali Farg‘ona viloyatini keyingi yilda “ishsizlikdan xoli hudud”ga aylantirishga munosib hissa qo‘shamiz, — deydi Jahongir Jumanov.
Mavzuga doir:
Izoh (0)