Toshkentdagi avtobuslarga qoidabuzarlikni qayd etuvchi videoregistratorlar o‘rnatilishi kutilmoqda. Bu haqda IIV Jamoat xavfsizligi departamenti yo‘l-harakat xavfsizligi boshqarma boshlig‘i Fazliddin Toshkenboyev ma’lum qildi.
Uning ta’kidlashicha, jamoat transporti uchun mo‘ljallangan yo‘laklardan foydalangan va o‘z avtomobilini bekatlarga qoidaga zid ravishda qoldirib ketgan haydovchilarga chora ko‘rish bo‘yicha yangi tizim ishga tushadi.
“Avtomobillarning yo‘l yoqalariga tartibsiz qoldirib ketish holatlari juda ko‘p. Buning oldini olish maqsadida jamoat transportlariga videoregistratorlar o‘rnatish rejalashtirilgan. Bu orqali inson omilini cheklagan holda qoidabuzarlarga nisbatan jazo choralarini qo‘llash yo‘lga qo‘yiladi”, — dedi Toshkentboyev.
Poytaxt hokimi Jahongir Ortiqxo‘jayev, ichki ishlar vaziri o‘rinbosari Bekmurod Abdullayev va “Toshshahartransxizmat” boshqaruv raisi Anvar Jo‘rayev boshchiligida poytaxtdagi jamoat transporti muammolarini hal qilish yuzasidan idoralararo tezkor ishchi guruhi mas’ullari yig‘ilishida bir qator vazifalar qatorida mashinani noqonuniy tarzda yo‘l chetlari va bozor atroflarida qoldirib, sun’iy tirbandlik keltirib chiqarayotganlarga chora ko‘rish belgilangandi.
Noyabr oyida Samarqand viloyatidagi aksariyat avtobuslarga shunday videoregistrator uskunalari o‘rnatilgandi.
Mavzuga doir:
Izoh (0)