AQSH prezidenti Jo Bayden Amerika qo‘shinlarini Ukrainaga yubormaydi, dedi Oq uyning yuqori martabali rasmiysi.
“U (Jo Bayden) AQSHning Ukrainaga rossiyaliklarga qarshi to‘g‘ridan to‘g‘ri jang qilishi uchun qo‘shin yubormasligi haqida ikkilanmayapti va ertaga ham, bir oy yoki bir yildan keyin ham ikkilanmaydi”, — dedi rasmiy. Buning o‘rniga Qo‘shma Shtatlar Ukrainaga “o‘n milliardlab dollarlik” qurol va jihozlarni yubormoqda, deya eslatdi u.
Ukrainada urush boshlanganidan so‘ng, AQSH rasmiylari mojaro zonasiga harbiy xizmatchilarni yubormasligini bir necha bor ta’kidlagan. Vashington Kiyevga qator harbiy yordamlar yubordi — Kil Jahon iqtisodiyoti instituti hisob-kitoblariga ko‘ra, 24-yanvardan 20-noyabrgacha buning miqdori taxminan 24 milliard dollarni tashkil etgan.
Bugun, 21-dekabr kuni Ukraina prezidenti Vladimir Zelenskiy Vashingtonga jo‘nab ketgani haqida xabar berildi. U AQSH prezidenti bilan uchrashib, nizo zonasidagi strategik vaziyatni, sanksiyalarni va Ukrainaga ko‘makni muhokama qiladi, shuningdek, Kongressda nutq so‘zlaydi.
Bundan tashqari, Oq uy Ukrainaga 2 milliard dollarlik yangi yordam paketini e’lon qildi, unga Patriot havo hujumiga qarshi mudofaa batareyalari kiradi.
Izoh (0)