Қозоғистон Россиядан Қозоғистон, РФ ва Ўзбекистон ўртасида газ иттифоқи бўйича алоҳида ташкилот тузиш ҳақида қандайдир расмий таклифлар олмаган. Ҳозирча бу газ савдоси жараёнларини интеграциялаш бўйича бир ғоя, холос. Бу ҳақда Қозоғистон ташқи ишлар вазири ўринбосари Алмас Айдаров маълум қилди.
«Газ иттифоқини тузиш Россия томонининг таклифи эди, ва у ҳозирча ҳеч қандай ҳужжат билан расмийлаштирилмаган, бу қандай шаклда амалга оширилиши бўйича ҳеч қандай тафсилотлар ва таклифларни Россия томонидан олганимизча йўқ. Бу ҳозирча газ савдоси бўйича қандайдир жараёнларни интеграциялашга оид бир ғоя, холос», — деди Айдаров парламент йиғилишида.
Унинг таъкидлашича, ҳамма нарса Қозоғистонга таклиф қилинадиган шартларга боғлиқ бўлади. Қозоғистон ташқи ишлар вазири ўринбосарининг сўзларига кўра, газ бўйича алоҳида тузилма ёки давлатлараро иттифоқ тузиш масаласи ҳозирча кўтарилгани йўқ.
«Бу газ етказиб бериш, уни тартибга солиш ва нарх бўйича ғоя эди, холос. Газ танқислиги барча мамлакатларда мавжуд, шунинг учун Россия томони шундай таклиф билан чиқди», — дея аниқлик киритди Алмас Айдаров.
Ноябрь охирида Россия ва Қозоғистон президентлари Владимир Путин ва Қосим-Жўмарт Тўқаев Москвада учрашув ўтказиб, Россия, Қозоғистон ва Ўзбекистон иштирокида «уч томонлама газ иттифоқи» тузишни муҳокама қилди. 7 декабрь куни Ўзбекистон энергетика вазири Жўрабек Мирзамаҳмудов мамлакат тижорий шартномалар асосида газ импорт қилишни режалаштираётгани, бунинг учун «қандайдир альянс ёки иттифоқ»қа аъзо бўлиш шарт эмаслигини айтди.
Аввалроқ Қозоғистон энергетика вазир Болат Акчулаков Россия ва Ўзбекистон иштирокида газ иттифоқини тузиш имкониятлари ҳақида гапирганди. Унинг сўзларига кўра, аслида уч томонлама газ иттифоқи масаласи муҳокама қилинмади. «Барча муҳокамалар икки томонлама ҳамкорлик форматида бўлди. Масалан, Қозоғистон — Россия, Қозоғистон —Ўзбекистон. Яъни бу уч томонлама форматда муҳокама қилинмади», — деди Акчулаков.
Изоҳ (0)