2022-yilda Vladimir Putinning Federal Majlisga murojaati bo‘lmaydi, u keyingi yilga ko‘chirildi, deb xabar berdi “Kommersant”ga Rossiya prezidenti ma’muriyatiga yaqin uch manba.
Nashr suhbatdoshlariga ko‘ra, noyabr—dekabr oylarida ma’muriyatda tadbirga “tayyorgarlik” ko‘rilgan, ammo keng ko‘lamli ishlar qilingani noma’lum.
Rossiya prezidenti ma’muriyatidagi vaziyatdan yaxshi xabardor manba jurnalistlar bilan suhbatda, frontdagi vaziyat aniq bo‘lganidan keyingina prezident parlamentda nutq so‘zlagani ma’qulroq ekanini aytdi.
“Vladimir Putinning murojaati har doim kelajakning ma’lum bir tasviri bilan bog‘liq”, — deb tushuntirdi boshqa suhbatdosh. Uning qo‘shimcha qilishicha, murojaatda, jumladan, Ukrainadagi urush haqida gapirish kerak, bu haqda esa prognoz qilish qiyin bo‘lmoqda.
Keyinroq Rossiya prezidentining matbuot kotibi Dmitriy Peskov jurnalistlarga Putin 2022-yilda Federal Majlisga murojaat yo‘llamasligini tasdiqladi.
Oxirgi marta Vladimir Putin Federal Majlisga 2021-yil aprel oyida murojaat qilgan edi. Rossiya Federatsiyasi Konstitutsiyasiga ko‘ra, prezident yilda bir parlamentga murojaat bilan chiqishi kerak. Biroq,Putinning murojaati avval ham qoldirilgan: 2017-yil oxiridan 2018-yilning birinchi yarmigacha.
Avvalroq Putinning 10 yildan buyon har dekabr oyida bo‘ladigan katta matbuot anjumani 2022-yilda o‘tkazilmasligi e’lon qilingandi. Buyuk Britaniya Mudofaa vazirligi harbiy razvedkasi Putinning matbuot anjumani Ukrainadagi urushning “muhokamasi”dan xavfsirab, bekor qilinganini taxmin qildi.
Izoh (0)