Peru respublikasi Kongressi 2024-yil aprelida muddatidan avvalgi saylovlarni o‘tkazish to‘g‘risidagi qonun loyihasini birinchi o‘qishda ma’qulladi. Bu haqda parlament matbuot xizmati o‘z Twitter’ida xabar berdi.
Ikkinchi o‘qishda qonun loyihasi kelasi yig‘ilishda ko‘rib chiqiladi.
Mamlakatda muddatidan oldingi saylovlarni o‘tkazishni Peru prezidenti Dina Boluarte taklif qilgandi. U tegishli qonun loyihasini parlamentga yo‘naltirgan, ammo 16-dekabr kuni Kongress uni rad etgan edi.
O‘shanda prezident parlament muddatidan avvalgi saylovlarni o‘tkazishni ma’qullamagunicha, iste’foga chiqmasligini aytdi va masalani qayta ko‘rib chiqishni talab qildi. Uning da’vo qilishicha, Peru aholisining 83 foizi navbatdan tashqari saylovlar o‘tkazilishi tarafdori.
Peruda siyosiy inqiroz 7-dekabr kuni, sobiq prezident Pedro Kastilyo Kongress tarqatib yuborilishini e’lon qilganidan keyin boshlandi. U buni korrupsiya ayblovlari tufayli, o‘ziga nisbatan impichment e’lon qilish masalasini ko‘rib chiqmoqchi bo‘lgan parlament majlisi oldidan amalga oshirdi. Biroq yig‘ilish baribir bo‘lib o‘tdi va parlament a’zolari prezidentni iste’foga chiqardi. Shundan keyin Kastilyo qo‘lga olindi va isyonda ayblanib, 18 oyga hibsga joylashtirildi.
Davlat rahbari vakolatlari vitse-prezident Boluartega o‘tdi. Muddatidan avvalgi prezident saylovlaridan tashqari, u konstitutsiyaviy islohot o‘tkazishni taklif qildi.
Kastilyoga nisbatan impichment e’lon qilingach, mamlakatning ayrim hududlarida noroziliklar boshlandi. Ularning ishtirokchilari Boluartening iste’fosini, Kastilyo huquqlarining qayta tiklanishini, kongress tarqatib yuborilishini va muddatidan avvalgi saylovlar o‘tkazilishini talab qildi. Peru hukumati “vandalizm va zo‘ravonlik harakatlari, avtomagistrallar va yo‘llar egallab olinishi tufayli”, mamlakatda 30 kun muddatga favqulodda holat rejimini joriy qildi.
Mavzuga doir:
Izoh (0)