Jahon banki “Ukrainaning shoshilinch ehtiyojlarini qondirish uchun” 610 million dollar ajratishga rozi bo‘ldi. Bu haqda bank veb-saytida xabar qilindi.
Moliyaviy paket “Ukrainaga yordam berish va uni qayta tiklash bo‘yicha sa’y-harakatlarni kuchaytirish loyihalarini o‘z ichiga oladi”, — deyiladi bayonotda. Uning doirasida Jahon banki Ukrainaga Xalqaro tiklanish va taraqqiyot bankidan (XTTB, Jahon bankining bir qismi) 500 million dollar kredit ajratishga qaror qildi.
Kredit Buyuk Britaniya kafolati ostida berilmoqda. Pul “Ukraina hukumatiga bolalar va oilalar nafaqalari, davlat xizmatchilarining maoshlari va kommunal to‘lovlar bilan bog‘liq xarajatlarni qoplashga yordam beradi”, — deyiladi tashkilot xabarida.
“Jahon banki Ukrainani sog‘liqni saqlash xizmatlaridan foydalanish imkoniyatini tiklash va yaxshilash bo‘yicha yangi loyiha bilan ham qo‘llab-quvvatlamoqda”, — deya qo‘shimcha qildi matbuot xizmati.
Gap Health Enhancement and Life-saving loyihasi (HEAL Ukraine, “Salomatlikni yaxshilash va hayotni saqlab qolish”) haqida bormoqda. Jahon banki loyihaning birlamchi tibbiy yordamni kuchaytirishi, “urush tufayli ruhiy salomatlik va reabilitatsiya xizmatlariga ortib borayotgan talabni qondirishi, kasalxonalarda sog‘liqni saqlash xizmatlarini ko‘rsatishni tiklash va kuchaytirishi” hamda asosiy sog‘liqni saqlash muassasalari salohiyatini rivojlantirishni qo‘llab-quvvatlashiga umid qilmoqda.
Ushbu dastur XTTBning yana 100 million yevrolik krediti (106 million dollardan ortiq) va Global moliyalashtirish fondining 10 million dollarlik granti hisobidan moliyalashtiriladi. Jahon banki kelgusida moliyalashtirishni 500 million dollargacha oshirishi kutilmoqda.
Umuman olganda, fevral oyidan beri Jahon banki Ukrainani qo‘llab-quvvatlash uchun 18 million dollar ajratdi. 20-dekabr kuni Ukraina Moliya vazirligi davlat budjetiga AQSH tomonidan Jahon banki orqali o‘tkazilgan 2 milliard dollar tushganini ma’lum qildi.
Izoh (0)