Amerika tomoni navbatdagi harbiy yordam paketi doirasida Ukrainaga Patriot zenit-raketa majmualarini hamda o‘q-dorilarni “aqlli” bombalarga aylantiradigan uskunalarni yuboradi. Bu haqda CNN o‘z manbalariga tayanib xabar bermoqda. Qurol-yarog‘lar kelasi haftadayoq Ukraina qurolli kuchlariga yetkazib berilishi kutilmoqda.
“Yuqori aniqlikdagi bombalar Ukrainaga Rossiyaning turg‘un mudofaa chiziqlariha yoki boshqa yirik obyektlarga hujum qilishda yordam beradi. Biroq ularni qiruvchilardan tashlash kerak, bu esa Rossiyaning o‘z havo hujumiga qarshi mudofaa tizimlari borligi uchun jiddiy muammo bo‘lib qolmoqda”, — deyiladi nashr xabarida.
CNN boshqa tafsilotlarni keltirmayapti.
Ukraina prezidenti Vladimir Zelenskiy 21-dekabr kuni AQSH prezidenti Jo Bayden bilan uchrashish uchun Vashingtonga uchib ketgani xabar berilmoqda. Zelenskiy Patriot raketa tizimlarini o‘z ichiga oladigan harbiy yordamning yangi paketini muhokama qilish uchun Bayden bilan ko‘rishishni rejalashtirmoqda.
Zelenskiy 18-dekabr kuni Bayden bilan Kiyevga Patriot zenit-raketa majmualarini yetkazib berish haqidagi muzokaralar ijobiy natijaga qarab siljiyotganini aytgandi. “Men bu masalaga pozitiv bilan qarayman. Katta pozitiv bilan”, — degandi u.
Ukraina prezidenti “jarayon borayotgani”ni va yetkazib berish masalasi bilan shaxsan o‘zi shug‘ullanayotganini qo‘shib qo‘ygandi.
Kiyev AQSH va ittifoqdoshlaridan havo hujumiga qarshi mudofaaning universal vositasi sifatida foydalaniladigan Patriot zenit-raketa majmualarini yetkazib berishni bir necha marta so‘ragan. Ukraina tashqi ishlar vaziri Dmitriy Kuleba ushbu tizimlar Ukrainaning muhim infratuzilmasini himoya qila olishini aytgandi.
Avvalroq CNN AQSH prezidenti Jo Bayden ma’muriyati Ukrainaga Patriot zenit-raketa majmualarini yuborishga tayyorgarlik jarayonini yakunlayotgani haqida xabar bergandi.
Patriot zenit-raketa majmuasi yuborilishini Pentagon rahbari Lloyd Ostin ma’qullashi kerak, shundan keyin esa qaror Bayden tomonidan tasdiqlanadi.
Izoh (0)