Peru prezidenti Dina Boluarte o‘z lavozimini tark etishi kerak deb hisoblamasligini ma’lum qildi va Kongressni (mamlakat parlamenti) muddatidan oldin saylovlar o‘tkazishni ma’qullashga chaqirdi.
Davlat rahbarining so‘zlariga ko‘ra, uning iste’fosi “muammoni hal qilmaydi”. U o‘z navbatida qo‘lidan kelgan barcha ishni qilganini, xususan, Kongressga saylov o‘tkazish to‘g‘risidagi qonun loyihasini yuborganini ta’kidladi.
“Men ulardan saylovda ovoz berish imkoniyatini qayta ko‘rib chiqishni talab qilaman”, — dedi Boluarte.
16-dekabr kuni Kongress prezidentlik saylovlarni 2023-yilga ko‘chirish bo‘yicha taklif qilingan konstitutsiyaviy islohotni ma’qullamagan edi.
Peruda hokimiyat inqirozi dekabr oyi boshida, parlamentariylar sobiq prezident Pedro Kastilyoni korrupsiya bilan bog‘liq holda hokimiyatdan chetlatish imkoniyatini uchinchi marta muhokama qilganidan so‘ng, Kastilyo Kongress tarqatib yuborilgani va mamlakatda favqulodda holat joriy etilganini e’lon qilishi ortidan yuzaga keldi. Prezident tomonidan ko‘rilgan choralarga qaramay, parlament a’zolari yig‘ilish o‘tkazib, Kastilyoga impichment e’lon qildi. Ko‘p o‘tmay u hibsga olindi va unga nisbatan jinoiy ish ochildi.
Bu voqealar ortidan mamlakatning qator tumanlarida tartibsizliklar kuzatildi. Lotin Amerikasi ommaviy axborot vositalarining ta’kidlashicha, Boluarte, aftidan, hali mamlakatdagi siyosiy vaziyatni barqarorlashtirishga muvaffaq bo‘lmagan.
Izoh (0)