Peruda prezident Pedro Kastilyoga nisbatan parlament tomonidan impichment e’lon qilingach, u politsiya tomonidan qo‘lga olindi. Bu haqda La Vanguardia va El Comercio nashrlari xabar bermoqda.
El Comercio ma’lumotlariga ko‘ra, kongress Pedro Kastilyoni lavozimidan ozod etish haqida qaror qabul qilgach, maxsus yig‘ilishda Peru vitse-prezidenti Dina Boluarte respublikaning yangi prezidenti sifatida qasamyod qabul qilgan.
Peru parlamenti 7-dekabr kuni prezidentga nisbatan impichment masalasini uchinchi marta ko‘rib chiqishi kerak edi. Undan avvalgi urinishlar esa muvaffaqiyatsizlikka uchragandi. Biroq bundan bir necha soat avval Kastilyo murojaat bilan chiqdi.
Kongress Kastilyoni korrupsiyaviy jinoyatlarni amalga oshirganlikda aybladi. Prezident o‘z murojaatida ayblovlarni inkor qildi va ularni asossiz deb atadi. Parlamentning bir qismi prezidentning hokimiyatdan ag‘darilishini u lavozimiga kirishganidan buyon “kun tartibida mavjud bo‘lgan yagona band” deb hisoblaydi, dedi u.
Kastilyo respublika kongressini tarqatib yuborib, mamlakatda komendantlik soatini joriy qildi. Shunga qaramay, kongress mamlakat prezidentini chetlatish haqida qaror qabul qildi. Qaror 101 nafar kongressmen tomonidan qo‘llab-quvvatlandi, u ma’qullanishi uchun esa 87 ta ovoz yetarli bo‘ladi.
RPP radiosi o‘z manbalariga tayanib ma’lum qilishicha, politsiya va harbiylar kongress tomoniga o‘tgan. Prezident bayonotidan keyin politsiya bosh qarorgohida favqulodda yig‘ilish boshlangan.
Kastilyoning xatti-harakatlarini Boluarte qoralab chiqdi. Adliya vaziri Feliks Shero, iqtisodiyot vaziri Kurt Burneo, tashqi ishlar vaziri Sezar Landa va mehnat vaziri Alexandro Salas va boshqa siyosatchilar iste’fo berdi.
Peru bosh prokuraturasi davlat rahbarini Konstitutsiyani qo‘pol ravishda buzishda aybladi. Idora rahbari Daniel Soria Kastilyoga qarshi jinoiy ish qo‘zg‘ash bilan tahdid qildi.
Konstitutsiyaviy sud raisi Fransisko Morales voqealarni to‘ntarish deb atadi va kongressni vakolatlarni davlat rahbari Boluartega topshirishga chaqirdi.
Kastilyo 2021-yil iyulida Peru prezidenti saylovida g‘olib chiqqan edi. Sobiq qishloq o‘qituvchisi ijtimoiy islohotlar o‘tkazish va mamlakat boyliklarini odilona taqsimlash haqidagi populistik va’dalari bilan aholining eng qashshoq qatlamlarining ovozlarini qo‘lga kiritgandi.
Izoh (0)