Afg‘onistonda hokimiyat tepasida turgan “Tolibon” harakati hibsdagi ikki amerikalikni ozod qildi. Bu haqda AQSH Davlat departamenti matbuot kotibi Ned Prays brifing chog‘ida aytib o‘tdi.
Praysdan AQSHning ikki fuqarosi Afg‘onistondagi qamoqxonadan ozod qilingani va Qatar poytaxti Dohaga uchib ketgani haqidagi xabarlarga izoh berish so‘ralgan. Jurnalistlardan biri “Tolibon”ning mahbuslarni ozod qilishi evaziga AQSH ularga nima taklif qilganiga qiziqdi.
“Buni ‘Tolibon’ tarafidan yaxshi niyat ishorasi deb tushunyapmiz. Bu qaysidir qo‘lga olinganlar yoki mahbuslar almashinuvining bir qismi emasdi. Biz, albatta, bu ikki amerikalikning ozod etilishini olqishlaymiz”, — deb javob berdi Davlat departamenti vakili.
“Afg‘onistonda yana shunday AQSH fuqarolari bormi?” — degan savolga Prays “Tolibon” tomonidan hibsga olingan amerikaliklar haqida batafsil ma’lumot berolmasligini aytdi.
AQSHning ikki fuqarosi “Tolibon” tomonidan ozod etilgani haqida 20-dekabr kuni CNN telekanali masaladan xabardor uch manbaga tayanib xabar bergandi. Suhbatdoshlarning telekanalga aytishicha, ozod etilgan amerikaliklar Qatarga ketgan. Manbalarga ko‘ra, ozod etilganlardan biri rejissyor Ayvor Shirer. U afg‘on prodyuseri Fayzulla Fayzbaxsh bilan birga 2022-yilning avgustida Kobulda film suratga olish vaqtida hibsga olingan, deb yozadi telekanal huquq himoyachilariga tayanib. Ikkinchi amerikalikning nomi uning oilasi iltimosiga ko‘ra oshkor etilmagan.
Sentabr oyida AQSH prezidenti Jo Baden “Tolibon” asoschisi Muhammad Umar Mujohidning eng yaqin sheriklaridan biri Bashir Nurzayni amerikalik Mark Frerixsning Afg‘onistondagi asirlikdan ozod qilinishi evaziga afv etgandi, deb yozadi Reuters. Nurzay qamoqda 17 yil o‘tirgan. AQSH rasmiylari uni Amerika va Yevropaga 50 million dollardan ortiq geroin kontrabandasida ayblagan. Nurzayning advokati uning kontrabandaga aloqadorligini rad etgan.
Frerixs qurilish muhandisi va AQSH dengiz floti faxriysi. Afg‘onistonda qurilish loyihalarida ishlagan bu amerikalik 2020-yil yanvar oyida o‘g‘irlab ketilgan.
Izoh (0)