Rossiyalik deputat Putin birinchi marta “maxsus operatsiya zonasi”ga borganini aytdi. “Agar u shtabni nazarda tutayotgan bo‘lsa, ha”, — deb javob berdi Peskov

Rossiya prezidenti matbuot kotibi Dmitriy Peskov Vladimir Putin, go‘yoki, birinchi marta jangovar harakatlar zonasiga borgani haqidagi axborot yuzasidan izoh berdi.

20-dekabr kuni Davlat dumasining “Yagona Rossiya”dan deputati, iste’fodagi general-leytenant Andrey Gurulev o‘z Telegram-kanaliga Vladimir Solovyovning “To‘liq kontakt” dasturidan parchani joyladi. Unda Gurulevning o‘zi Putin “maxsus harbiy operatsiya zonasida bo‘lgani” haqida aytgan.

“Aynan maxsus harbiy operatsiya zonasiga tashrif buyurish haqida gapiradigan bo‘lsak, bu yerda, albatta, oliy bosh qo‘mondon nafaqat vaziyat haqidagi hisobotlarni tinglab, nimadir haqida gapirgani emas, balki barcha qo‘mondonlar bilan shaxsan muzokara qilib, har birini shaxsan tinglagani juda muhimdir”, — dedi Gurulev.

Peskov “Rossiyskaya gazeta” nashriga deputatning gaplarini quyidagicha izohladi: “Agar Gurulev Putin juma kuni borgan shtabni nazarda tutgan bo‘lsa, unda ha”. Peskov boshqa tushuntirish bermadi. “Rossiyskaya gazeta” uning izohlaridan iborat xabarni “Kreml Putinning maxsus harbiy operatsiya zonasiga borganini tasdiqladi” degan sarlavha ostida e’lon qildi.

Avvalroq Kreml Vladimir Putin 16-dekabr kuni maxsus operatsiyaga jalb qilingan qo‘shinlar birlashgan shtabiga tashrif buyurgani va u yerda Rossiya armiyasi oliy qo‘mondonligi bilan majlis o‘tkazgani haqida xabar bergandi. Bu shtab aynan qayerda joylashganiga xabarda aniqlik kiritilmagan.

“Agentstvo” nashri shtabdan olingan videoni tahlil qilib, gap Janubiy harbiy okrug haqida borayotganini aniqladi. Mudofaa vazirligi ma’lumotlariga ko‘ra, u Rostov-Donda joylashgan.

Rasman Putin jangovar harakatlar zonasiga biror marta ham borgani yo‘q. O‘z navbatida, Ukraina prezidenti Vladimir Zelenskiy to‘liq ko‘lamli urushning 300-kunida Baxmutga keldi. Donetsk viloyatidagi ushbu shaharda so‘nggi oylarda eng og‘ir janglar bormoqda.

Avvalroq Vladimir Putin Donbassga borishni rejalashtirmayotgani xabar berilgandi. U Donbassga “mavridi kelganida” boradi, ammo hozircha bunday tashrif rejada yo‘q, degandi Rossiya rahbarining matbuot kotibi Dmitriy Peskov.