Перу республикаси Конгресси 2024 йил апрелида муддатидан аввалги сайловларни ўтказиш тўғрисидаги қонун лойиҳасини биринчи ўқишда маъқуллади. Бу ҳақда парламент матбуот хизмати ўз Twitter’ида хабар берди.
Иккинчи ўқишда қонун лойиҳаси келаси йиғилишда кўриб чиқилади.
Мамлакатда муддатидан олдинги сайловларни ўтказишни Перу президенти Дина Болуарте таклиф қилганди. У тегишли қонун лойиҳасини парламентга йўналтирган, аммо 16 декабрь куни Конгресс уни рад этган эди.
Ўшанда президент парламент муддатидан аввалги сайловларни ўтказишни маъқулламагунича, истеъфога чиқмаслигини айтди ва масалани қайта кўриб чиқишни талаб қилди. Унинг даъво қилишича, Перу аҳолисининг 83 фоизи навбатдан ташқари сайловлар ўтказилиши тарафдори.
Перуда сиёсий инқироз 7 декабрь куни, собиқ президент Педро Кастильо Конгресс тарқатиб юборилишини эълон қилганидан кейин бошланди. У буни коррупция айбловлари туфайли, ўзига нисбатан импичмент эълон қилиш масаласини кўриб чиқмоқчи бўлган парламент мажлиси олдидан амалга оширди. Бироқ йиғилиш барибир бўлиб ўтди ва парламент аъзолари президентни истеъфога чиқарди. Шундан кейин Кастилё қўлга олинди ва исёнда айбланиб, 18 ойга ҳибсга жойлаштирилди.
Давлат раҳбари ваколатлари вице-президент Болуартега ўтди. Муддатидан аввалги президент сайловларидан ташқари, у конституциявий ислоҳот ўтказишни таклиф қилди.
Кастилёга нисбатан импичмент эълон қилингач, мамлакатнинг айрим ҳудудларида норозиликлар бошланди. Уларнинг иштирокчилари Болуартенинг истеъфосини, Кастильо ҳуқуқларининг қайта тикланишини, конгресс тарқатиб юборилишини ва муддатидан аввалги сайловлар ўтказилишини талаб қилди. Перу ҳукумати «вандализм ва зўравонлик ҳаракатлари, автомагистраллар ва йўллар эгаллаб олиниши туфайли», мамлакатда 30 кун муддатга фавқулодда ҳолат режимини жорий қилди.
Изоҳ (0)