Peru armiyasi mamlakat bo‘ylab davom etayotgan norozilik namoyishlari tufayli aeroportlar va gidroelektrstansiyalari singari muhim infratuzilmalarni himoya qilishga kirishdi, deb ma’lum qildi mudofaa vaziri Alberto Otarola. Reuters xabariga ko‘ra, mamlakatda Apurimak, Arekipa va Kusko aeroportlari yopilgan.
Bundan tashqari, Otarolaning so‘zlariga ko‘ra, hukumat namoyishlar paytida to‘sib qo‘yilgan avtomobil yo‘llarida favqulodda holat e’lon qilmoqchi. U namoyishchilarni tinch mitinglar o‘tkazishga va rasmiylar bilan muloqotga chaqirdi. “Biz barcha peruliklarning erkin harakatlanishini ta’minlash maqsadida butun mamlakat bo‘ylab milliy yo‘l tarmog‘ini nazorat qilishni rejalashtirmoqdamiz, shuningdek, ular Konstitutsiyada kafolatlangan huquqlaridan yetarli darajada foydalanishi mumkin”, — dedi Mudofaa vazirligi rahbari. Uning qo‘shimcha qilishicha, harbiylar milliy politsiya bilan birgalikda Ika, Arekipa va Andauaylas shaharlarida tartibni ta’minlaydi.
Peruda favqulodda holat rejimi allaqachon Abankaye, Andauaylas, Chinchero, Kotabambas, Antabambaye va boshqa shaharlarda joriy etilgan. Shuningdek, Ika va Arekipada ham favqulodda holat e’lon qilinishi rejalashtirilgan.
Perudagi norozilik namoyishlari dekabr oyi boshida, parlament (muxolifatchilar ko‘proq o‘ringa ega) prezident Pedro Kastilyoga “doimiy ma’naviy uquvsizligi” tufayli impichment e’lon qilganidan keyin boshlandi. U hibsga olingan. Kastilyo bu ayblovlarni rad etdi. Davlat rahbarining vakolatlari Peru vitse-prezidenti Dina Boluartega o‘tdi, u 2024-yilda muddatidan oldin saylovlar va konstitutsiyaviy islohotlar o‘tkazishni taklif qildi.
Namoyishchilar muddatidan oldin prezidentlik saylovlari o‘tkazish va parlamentni tarqatib yuborishni talab qilmoqda. Namoyishlar chog‘ida yetti kishi halok bo‘lgan. Bundan tashqari, yuzdan ortiq politsiyachi jarohatlangan.
Mavzuga doir: Peruda yangi prezidentga qarshi namoyish ishtirokchilari aeroportni egallab oldi va terminallarga o‘t qo‘ydi
Izoh (0)