Suriya havo hujumiga qarshi mudofaa tizimlari Isroil tomonidan Damashq yaqinidagi nishonlarning o‘qqa tutilishi chog‘ida bir qator raketalarni urib tushirdi, hujum oqibatida ikki nafar harbiy jarohat oldi. Bu haqda SANA davlat agentligi suriyalik harbiy manbaga tayanib, xabar berdi.
Manbaning aytishicha, Isroil raketa hujumi 20-oktabr kuni mahalliy vaqt bilan soat 00:30 atrofida (Toshkent vaqti bilan 02:30) sodir bo‘lgan, zarbalar Tabariya ko‘lining shimoli-sharqidan yo‘llangan. “Hujumda ikki nafar harbiy xizmatchi tan jarohati oldi va bir qancha moddiy yo‘qotishlar ko‘rildi”, — dedi manba.
Shu bilan birga, Suriya inson huquqlari observatoriyasi xabariga ko‘ra, Damashq aeroporti yaqinida va poytaxt chekkasidagi o‘qqa tutishlar oqibatida ikki nafar shaxsi aniqlanmagan kishi halok bo‘lgan, ular Livanning “Hizbulloh” tashkiloti bilan hamkorlikda ishlagan odamlar bo‘lishi mumkin.
Tashkilot ma’lumotlariga ko‘ra, Isroil Damashq xalqaro aeroporti yaqinidagi Eron jangarilarining pozitsiyalariga va shahar yaqinidagi Sayyid Zaynab hududidagi fermer xo‘jaliklariga kamida to‘rt marta zarba bergan. Ulardan biri “Hizbulloh”ning qurol-yarog‘ va logistika omborini vayron qilgan, deya ta’kidlanadi observatoriya xabarida. Shuningdek, “hujum joyida ko‘plab qurbonlar borligi” haqida ma’lumot tarqalayotgani qo‘shimcha qilindi.
The Times of Israel nashri Isroil tomonidan Suriya harbiy obektiga qarshi oxirgi hujum 11-dekabr kuni sodir bo‘lganini ta’kidladi. Bir necha soat o‘tgach esa, ommaviy axborot vositalarida Isroil armiyasi Suriya janubiga suriyalik askarlarni Isroilda terrorchi deb topilgan “Hizbulloh” bilan hamkorlikni to‘xtatish haqida ogohlantiruvchi risolalarni tashlab ketgani haqida nashrlar tarqaldi.
Isroil armiyasi hujumlar haqidagi xabarlarga izoh bermayapti.
Izoh (0)