Putin Rossiya kontrrazvedkasini xorijiy kuchlarning harakatlarini qat’iy bostirishga va xoinlarni aniqlashga chaqirdi (video)

Rossiya prezidenti Vladimir Putin Xavfsizlik organlari xodimlari kuni munosabati bilan yo‘llagan tabrigida mamlakat kontrrazvedka kuchlarini xorijiy maxsus xizmatlarning harakatlarini to‘xtatishga chaqirdi. U yangi hududlardagi xavfsizlik idoralarini zamonaviy texnika, qurol-yarog‘ va tajribali xodimlar bilan ta’minlashga va’da berdi. Putin, shuningdek, Federal xavfsizlik xizmatidan fuqarolarning ommaviy yig‘iladigan joylari, strategik obyektlar, transport va energetika infratuzilmasini doimiy nazoratda saqlashni so‘radi.

“Hozir kontrrazvedka idoralaridan, jumladan, harbiylardan maksimal shaylik, kuchlarni jamlash talab etiladi. Xorijiy razvedka xizmatlarining harakatlarini keskin bostirish, sotqinlar, josuslar va qo‘poruvchilarni tezda aniqlash zarur”, — dedi Putin Kreml saytida e’lon qilingan murojaatida.

Shuningdek, u FXX chegara xizmati faoliyatini kuchaytirishga chaqirdi va davlat chegarasi “ishonchli himoyalanishi, uni buzishga urinishlar mavjud kuch va vositalar, jumladan, mobil operatsiyalar va maxsus kuchlar bo‘linmalaridan foydalangan holda tez va samarali to‘xtatilishi kerak”ligini aytdi.

Rossiya prezidentining so‘zlariga ko‘ra, “dunyodagi jadal o‘zgaruvchan vaziyat” sharoitida mamlakat xavfsizlik idoralarining butun tizimiga “talablar ortib bormoqda”, shuning uchun “asosiy sohalarda ishni jiddiy kuchaytirish” zarur.

“Ayniqsa, Rossiyaning yangi hududlarida ish boshlagan xavfsizlik idoralari bo‘linmalarini alohida ta’kidlamoqchiman. Ha, hozir siz uchun qiyin: Donetsk va Lugansk xalq respublikalari, Xerson va Zaporojye viloyatlarida vaziyat nihoyatda og‘ir”, — dedi Rossiya rahbari. Uning fikricha, yangi hududlar aholisining “maksimal xavfsizligini ta’minlash, ularning huquq va erkinliklariga rioya etilishi uchun barcha zarur ishlarni qilish” xavfsizlik xodimlarining burchidir.

Bundan tashqari, Putin ekstremizmga qarshi kurashga “e’tiborni susaytirmaslik”ga chaqirdi. U “jamiyatning ichki birligiga” to‘g‘ridan to‘g‘ri tahdidni “jangovar millatchilik, zo‘ravonlikka da’vatlar, etnik adovatni qo‘zg‘atishga qaratilgan provokatsiyalar” deb atadi.