Сурия ҳаво ҳужумига қарши мудофаа тизимлари Исроил томонидан Дамашқ яқинидаги нишонларнинг ўққа тутилиши чоғида бир қатор ракеталарни уриб туширди, ҳужум оқибатида икки нафар ҳарбий жароҳат олди. Бу ҳақда SANA давлат агентлиги суриялик ҳарбий манбага таяниб, хабар берди.
Манбанинг айтишича, Исроил ракета ҳужуми 20 октябрь куни маҳаллий вақт билан соат 00:30 атрофида (Тошкент вақти билан 02:30) содир бўлган, зарбалар Табария кўлининг шимоли-шарқидан йўлланган. «Ҳужумда икки нафар ҳарбий хизматчи тан жароҳати олди ва бир қанча моддий йўқотишлар кўрилди», — деди манба.
Шу билан бирга, Сурия инсон ҳуқуқлари обсерваторияси хабарига кўра, Дамашқ аэропорти яқинида ва пойтахт чеккасидаги ўққа тутишлар оқибатида икки нафар шахси аниқланмаган киши ҳалок бўлган, улар Ливаннинг «Ҳизбуллоҳ» ташкилоти билан ҳамкорликда ишлаган одамлар бўлиши мумкин.
Ташкилот маълумотларига кўра, Исроил Дамашқ халқаро аэропорти яқинидаги Эрон жангариларининг позицияларига ва шаҳар яқинидаги Саййид Зайнаб ҳудудидаги фермер хўжаликларига камида тўрт марта зарба берган. Улардан бири «Ҳизбуллоҳ»нинг қурол-яроғ ва логистика омборини вайрон қилган, дея таъкидланади обсерватория хабарида. Шунингдек, «ҳужум жойида кўплаб қурбонлар борлиги» ҳақида маълумот тарқалаётгани қўшимча қилинди.
The Times of Israel нашри Исроил томонидан Сурия ҳарбий обектига қарши охирги ҳужум 11 декабрь куни содир бўлганини таъкидлади. Бир неча соат ўтгач эса, оммавий ахборот воситаларида Исроил армияси Сурия жанубига суриялик аскарларни Исроилда террорчи деб топилган «Ҳизбуллоҳ» билан ҳамкорликни тўхтатиш ҳақида огоҳлантирувчи рисолаларни ташлаб кетгани ҳақида нашрлар тарқалди.
Исроил армияси ҳужумлар ҳақидаги хабарларга изоҳ бермаяпти.
Изоҳ (0)