Rossiyaning Belgorod viloyati 18-dekabr, yakshanba kuni o‘qqa tutildi. Viloyat gubernatori Vyacheslav Gladkov o‘zining Telegram kanalida bu haqda ma’lum qildi.
Ma’lum qilinishicha, hodisa fonida havo hujumidan mudofaa tizimi ishga tushgan. Bir kishi halok bo‘lgan, to‘rt kishi jarohatlangan. Ular o‘rtacha og‘irlikdagi jarohat bilan kasalxonaga olib ketilgan.
“Ikki nafar bemor bilan voqea joyida gaplashdim. Erkakning beli, ayolning yuzi jarohatlangan. Mo‘jizaviy ravishda bu uydagi ikki bolaga hech narsa qilmagan. Snaryad yetib kelgan paytda ular epitsentrda bo‘lgan. Barcha zarur tibbiy yordam ko‘rsatiladi.
Shuningdek, Luch mikrorayonidagi 4 ta ko‘p qavatli uyning oynalari singan. Dastlabki ma’lumotlarga ko‘ra, 14 ta turar-joy binosi va 9 ta avtomashinada turli zararlar qayd etilgan. Barcha favqulodda xizmatlar hodisa joyida ishlamoqda. Afsuski, bir kishi halok bo‘ldi”, — deydi Belgorod gubernatori.
Ta’kidlanishicha, Belgorod viloyatida havo hujumidan mudofaa tizimi ishga tushgan, aholiga Favqulodda vaziyatlarning oldini olish va bartaraf etish xizmatidan SMS-xabar yuborilmoqda.
22-oktabr kuni Belgorod viloyati chegarasidagi Shebekino shahri o‘qqa tutilishi oqibatida ikki kishi halok bo‘lgandi. Rus OAV halok bo‘lganlarning biri o‘rta yoshli erkak, yana biri 16 yoshli o‘smir ekani haqida yozgan. Dastlab gubernator besh nafar tinch aholining yaralanganini aytgan. Keyinroq, hodisa sabab 11 kishi yaralangani, ulardan to‘rt nafarining ahvoli og‘irligi ma’lum bo‘lgan.
Izoh (0)