Ispaniya hukumati kichik va o‘rta biznes kompaniyalari xodimlari uchun ish haftasini qisqartirish bo‘yicha tajriba loyihasini ishga tushirdi, deb xabar bermoqda Deutsche Welle.
Bunda kompaniyalar ixtiyoriy ravishda xodimlarning chorak qismi uchun ish vaqtini kamida 10 foizga qisqartirishi kerak bo‘ladi. Loyiha uchun jami 10 million yevro ajratilgan – agar firmalarda qo‘shimcha xarajatlar yuzaga kelsa, davlat ularni qoplashga tayyor. Tajriba muvaffaqiyatli o‘tgan taqdirda, u butun mamlakat bo‘ylab joriy etilishi mumkin.
Ispaniyaning yirik Telefónica konserni tajribadan oldin ham o‘z xodimlariga ish haqini 12 foizga qisqartirish bilan to‘rt kunlik ish haftasiga o‘tishni taklif qilgan. Ispaniyaning yana bir konserni, dasturiy ta’minot ishlab chiqaruvchi El Sol 2021-yilda doimgi maoshni saqlab qolgan holda to‘rt kunlik ish haftasiga o‘tish kompaniya samaradorligini oshirgani, xodimlarning mehnat unumdorligi oshgani va kompaniya mijozlari xursand bo‘lgani haqida ma’lum qilgandi.
Shunga o‘xshash loyihalar allaqachon turli mamlakatlarda boshlangan: Yaponiyada Microsoft juma kunini 2300 nafar xodimi uchun dam olish kuni qilib belgilagan va bu ularning mehnat unumdorligini 40 foizga oshirgan.
Yangi Zelandiyada Perpetual Guardian ko‘chmas mulk kompaniyasi to‘rt kunlik ish haftasiga o‘tdi, shundan so‘ng uning xo‘jayini kompaniya bundan aziyat chekmayotganini, aksincha, faqat gullab-yashnayotganini aytdi.
Ammo ba’zi boshqa mamlakatlarda firmalar qisqartirilgan ish vaqtini qoplash uchun yangi xodimlarni yollashga majbur bo‘ldi. Germaniyada to‘rt kunlik ish haftasining joriy etilishiga hali ham skeptik qaralmoqda.
Izoh (0)