Rossiyaning Belgorod viloyati chegarasidagi Shebekino shahri o‘qqa tutilishi oqibatida ikki kishi halok bo‘ldi, deb xabar bermoqda viloyat gubernatori Vyacheslav Gladkov.
Rus OAV halok bo‘lganlarning biri o‘rta yoshli erkak va yani biri 16 yoshli o‘smir ekani haqida yozmoqda. Dastlab gubernator besh nafar tinch aholining yaralanganini aytgandi. Keyinroq, uning aniqlashtirishicha, hodisa sabab 11 kishi yaralangan, ulardan to‘rt nafarining ahvoli og‘ir.
Bundan tashqari, Gladkovning so‘zlariga ko‘ra, Shebekinoning o‘qqa tutilishi oqibatida deyarli 15 ming kishi elektr energiyasidan uzilgan. “Oqibatlarni bartaraf etish va elektrga qayta ulanish uchun besh-olti soat kerak bo‘ladi”, — deya qo‘shimcha qildi u.
Shebekinoda qanday obyektlar o‘qqa tutilgani haqida rasmiy ma’lumot berilmagan. Avvalroq gubernator gap “fuqarolik obyektlari” haqida ketayotganini aytgandi. “Dojd” nashriga ko‘ra, zarba shahar bozoriga kelib tushgan.
Ma’lumot uchun, viloyat urush boshlanganidan beri o‘qqa tutib kelinmoqda. So‘nggi haftalarda zarbalar soni ko‘paygan. Viloyatda energetika obyektlari, aloqa va uy-joy kommunal xo‘jaligini muhofaza qilish chora-tadbirlari kuchaytirilishini ham viloyat hokimi ma’lum qilgan.
U Belgorod va chegara hududlaridagi tadbirkorlarga moslashuvchan jadval joriy etishni va xodimlarni masofaviy ishlashga o‘tkazish imkoniyatlarini ko‘rib chiqishni tavsiya qilgan.
Mavzuga doir:
- Belgorodda poyezdlar harakati to‘xtatildi, Kurskda elektr ta’minoti uzildi. Bu hududlar Ukraina qo‘shinlari tomonidan o‘qqa tutilgani aytilmoqda
- Belgoroddagi otishmada halok bo‘lganlar ro‘yxatida qayd etilgan 2 askar tirik bo‘lib chiqdi
- Tojikiston Tashqi ishlar vazirligi Belgorod yaqinidagi teraktga o‘z fuqarolarining aloqadorligini tekshiradi
- Belgoroddagi poligonda 11 kishi otib o‘ldirildi. Rossiya Mudofaa vazirligi buni “terakt” deb atadi
Izoh (0)