Россиянинг Белгород вилояти 18 декабрь, якшанба куни ўққа тутилди. Вилоят губернатори Вячеслав Гладков ўзининг Telegram каналида бу ҳақда маълум қилди.
Маълум қилинишича, ҳодиса фонида ҳаво ҳужумидан мудофаа тизими ишга тушган. Бир киши ҳалок бўлган, тўрт киши жароҳатланган. Улар ўртача оғирликдаги жароҳат билан касалхонага олиб кетилган.
«Икки нафар бемор билан воқеа жойида гаплашдим. Эркакнинг бели, аёлнинг юзи жароҳатланган. Мўъжизавий равишда бу уйдаги икки болага ҳеч нарса қилмаган. Снаряд етиб келган пайтда улар эпицентрда бўлган. Барча зарур тиббий ёрдам кўрсатилади.
Шунингдек, Луч микрораёнидаги 4 та кўп қаватли уйнинг ойналари синган. Дастлабки маълумотларга кўра, 14 та турар-жой биноси ва 9 та автомашинада турли зарарлар қайд этилган. Барча фавқулодда хизматлар ҳодиса жойида ишламоқда. Афсуски, бир киши ҳалок бўлди», — дейди Белгород губернатори.
Таъкидланишича, Белгород вилоятида ҳаво ҳужумидан мудофаа тизими ишга тушган, аҳолига Фавқулодда вазиятларнинг олдини олиш ва бартараф этиш хизматидан SMS-хабар юборилмоқда.
22 октябрь куни Белгород вилояти чегарасидаги Шебекино шаҳри ўққа тутилиши оқибатида икки киши ҳалок бўлганди. Рус ОАВ ҳалок бўлганларнинг бири ўрта ёшли эркак, яна бири 16 ёшли ўсмир экани ҳақида ёзган. Дастлаб губернатор беш нафар тинч аҳолининг яраланганини айтган. Кейинроқ, ҳодиса сабаб 11 киши яралангани, улардан тўрт нафарининг аҳволи оғирлиги маълум бўлган.
Изоҳ (0)