AQSH sobiq prezidenti Donald Tramp o‘zining Truth ijtimoiy tarmog‘iga superqahramon qiyofasida namoyon bo‘lgan videoni joyladi va 15-dekabr kuni “katta bayonot” berishini e’lon qildi, deb yozadi Daily Mail.
“Amerikaga superqahramon kerak. Men ertaga (15-dekabr kuni) muhim bayonot bilan chiqaman”, — deb yozdi Tramp.
15 soniyali videoda Tramp shu jumlani aytgan, so‘ng “T” harfi tushirilgan superqahramon kiyimidagi sobiq prezident tasviri paydo bo‘ladi. Uning ko‘zlaridan nur chiqayotganini ko‘rish mumkin, orqa fonda esa Trump Tower osmono‘par binosi turibdi.
Avvalroq Donald Tramp 2020-yilgi prezidentlik saylovlarida Bayden ustidan g‘alaba qozonganini da’vo qilib, konstitutsiyasini bekor qilishga chaqirgan edi.
“Bunday turdagi va miqyosdagi ommaviy firibgarlik barcha qoidalar va moddalarni, hatto konstitutsiyadagilarni ham bekor qilish imkonini beradi”, — dedi siyosatchi. Uning fikricha, Amerika asoschilari ikki yil avval prezidentlik saylovlarida yuz bergan firibgarlikni e’tiborsiz qoldirishni xohlamagan bo‘lardi.
15-noyabr kuni Tramp 2024-yilgi prezident sayloviga o‘z nomzodini qo‘yganini e’lon qildi. Shuningdek, u agar AQSH prezidenti bo‘lsa, saylov tizimini isloh qilishga va’da berdi.
Tramp 2017—2020-yillarda AQSH prezidenti bo‘lgan. 2020-yil yanvarida u amaldagi prezident Jo Baydenga lavozimini bo‘shatib bergan. Tramp o‘z mag‘lubiyatini tan olmagan va saylov natijalarini sud orqali bekor qilmoqchi bo‘lgan. Biroq AQSH Oliy sudi sobiq prezidentning ovoz berish yakunlarini qayta ko‘rib chiqish haqidagi da’vosini rad etgan.
Bayden oktabr boshida 2024-yilgi prezident saylovida Trampni yana mag‘lub etishiga ishonishini aytgandi. Shu bilan birga, amaldagi davlat rahbari saylovda qatnashish haqida qaror qabul qilganicha yo‘q, biroq buni Kongressga saylovlardan keyin hal qilishini aytgan.
Izoh (0)