Donald Tramp Twitter’ga qaytmasligini e’lon qildi

AQSHning sobiq prezidenti Donald Tramp Twitter’ga qaytmasligini e’lon qildi. Bu haqda The Hill xabar berdi.

Tramp ijtimoiy tarmoqning yangi egasi Ilon Maskni olqishlab, biroq Twitter hozirda juda ko‘p muammolarga duch kelayotganini aytdi. Shu sababdan u Truth Social ijtimoiy tarmog‘ida qolishini ta’kidladi. Mazkur platformani Tramp Twitter’da akkaunti bloklanganidan keyin ishga tushirgandi.

“Ularning Twitter’da muammolari yetarlicha, nima bo‘layotganini ko‘rib turibsiz”, — deydi Tramp.

AQSH sobiq prezidentining Twitter akkaunti ijtimoiy tarmoq ma’muriyati tomonidan 2021-yil yanvarida Kapitoliyga qilingan hujumga bag‘ishlangan tvitlar tufayli bloklangandi. Uning 90 millionga yaqin obunachisi bo‘lgan.

19-noyabr kuni Ilon Mask foydalanuvchilar orasida AQSHning sobiq prezidentini blokdan chiqarish kerakmi, deya so‘rovnoma o‘tkazgan. Unda 15 milliondan ortiq foydalanuvchi ishtirok etgan, 51,8 foiz foydalanuvchi Tramp akkauntini tiklash tarafdori bo‘lgan.

Shundan so‘ng, tunda Twitter AQSHning sobiq prezidentining akkauntini blokdan chiqargan. Sahifa siyosatchining barcha oldingi tvitlarini ham ko‘rsatadi. Bir sutkaga yetmasdan sahifaga 50 milliondan ortiq foydalanuvchi obuna bo‘lgan.