Tramp AQSH prezidenti bo‘lsa, saylov tizimini isloh qilishga va’da berdi
AQSH sobiq prezidenti Donald Tramp 2024-yilgi prezidentlik saylovlarida g‘alaba qozonsa, mamlakatdagi saylov tizimini o‘zgartirishga va’da berdi, deb yozmoqda CNBC.
Tramp ovoz berishdagi cheklovlar ro‘yxatini o‘zgartirish, faqat qog‘oz byulletenlarni qaytarish, saylov uchun bir kun vaqt berish hamda ovoz berishda qatnashmoqchi bo‘lganlar uchun majburiy foto ID joriy etish rejalarini ma’lum qildi. Shuningdek, u “barcha ovozlar saylov kechasi sanab chiqiladi” degan qoidani ham qaytarmoqchi.
“Men shunday qilaman. Bu men uchun o‘ta shaxsiy masala va buni yuragimga juda yaqin qabul qilaman”, — dedi Tramp.
Tramp 2017—2020-yillarda AQSH prezidenti bo‘lgan. 2020-yilgi saylovlarda mag‘lub bo‘lganidan keyin Tramp Oq uydagi nutqida aslida u g‘alaba qozonganini, ammo ovozlarni sanashda “korrupsiya va firibgarlik” bo‘lganini aytgandi.
16-noyabr kuni Tramp 2024-yilgi prezident sayloviga o‘z nomzodini qo‘ygani haqida e’lon qildi.
Amaldagi prezident Jo Bayden oktabr boshida 2024-yilgi prezident saylovida Trampni yana mag‘lub etishiga ishonishini aytgandi. Shu bilan birga, u saylovda qatnashish haqida qaror qabul qilganicha yo‘q, biroq buni Kongressga saylovlardan keyin hal qilishini aytgan.
