AQSH Kiyevga o‘q-dorilarni “aqlli bomba”ga aylantiradigan uskunalarni jo‘natmoqchi — WP

AQSH prezidenti ma’muriyati boshqarilmaydigan aviatsiya o‘q-dorilarini “aqlli bomba”ga aylantiruvchi uskunani Ukrainaga yuborishni rejalashtirmoqda, deb yozadi The Washington Post Amerikaning yuqori martabali rasmiylariga tayanib.

Gazeta manbalariga ko‘ra, gap GPS Joint Direct Attack Munition (JDAM) texnologiyasiga asoslangan, turli xildagi qurollarga biriktirilishi mumkin bo‘lgan uskunalar to‘plami haqida ketmoqda. Avval AQSH armiyasi ushbu texnologiyani bombardimonchi va qiruvchi samolyotlarda qo‘llaniladigan bombalar uchun ishlatgan.

The Washington Post ta’kidlashicha, AQSH prezidenti Jo Bayden yoki uning milliy xavfsizlik bo‘yicha bosh maslahatchilaridan birortasi JDAM’ni Ukrainaga yuborish g‘oyasini ma’qullaganmi-yo‘qmi, hozircha noma’lum.

AQSH Rossiyaning Ukrainadagi bosqini boshlanganidan so‘ng Kiyevga qurol-yarog‘ va texnika yetkazib berish bo‘yicha harbiy yordamni kuchaytirdi. Dekabr oyi boshida Vashington Ukrainaga havo mudofaasi tizimini mustahkamlash va dronlarga qarshi kurashish uchun mo‘ljallangan texnik vositalardan iborat 275 million dollarlik yangi harbiy yordam paketini jo‘natmoqchi ekani ma’lum qilindi.

Shu bilan birga, Vashington Kiyevga ayrim turdagi qurollarni, masalan, uzoq masofaga uchuvchi raketalarni yetkazib berishdan bosh tortmoqda. Pentagon buni Qo‘shma Shtatlar Ukrainadagi vaziyat yanada keskinlashuvini istamasligi bilan izohladi.

Mavzuga doir:

• Kreml AQSH Ukrainaga Patriot tizimlarini yetkazib bermoqchiligiga munosabat bildirdi
• Bayden: “AQSH Ukrainaga qo‘shinlar yuborish o‘rniga, unga moddiy yordam taqdim etmoqda”
• AQSH NASAMS tizimlarini Ukrainaga Yaqin Sharqdan ko‘chirib o‘tkazmoqchi