АҚШ собиқ президенти Дональд Трамп ўзининг Truth ижтимоий тармоғига суперқаҳрамон қиёфасида намоён бўлган видеони жойлади ва 15 декабрь куни «катта баёнот» беришини эълон қилди, деб ёзади Daily Mail.
«Америкага суперқаҳрамон керак. Мен эртага (15 декабрь куни) муҳим баёнот билан чиқаман», — деб ёзди Трамп.
15 сонияли видеода Трамп шу жумлани айтган, сўнг «Т» ҳарфи туширилган суперқаҳрамон кийимидаги собиқ президент тасвири пайдо бўлади. Унинг кўзларидан нур чиқаётганини кўриш мумкин, орқа фонда эса Trump Tower осмонўпар биноси турибди.
Аввалроқ Дональд Трамп 2020 йилги президентлик сайловларида Байден устидан ғалаба қозонганини даъво қилиб, конституциясини бекор қилишга чақирган эди.
«Бундай турдаги ва миқёсдаги оммавий фирибгарлик барча қоидалар ва моддаларни, ҳатто конституциядагиларни ҳам бекор қилиш имконини беради», — деди сиёсатчи. Унинг фикрича, Америка асосчилари икки йил аввал президентлик сайловларида юз берган фирибгарликни эътиборсиз қолдиришни хоҳламаган бўларди.
15 ноябрь куни Трамп 2024 йилги президент сайловига ўз номзодини қўйганини эълон қилди. Шунингдек, у агар АҚШ президенти бўлса, сайлов тизимини ислоҳ қилишга ваъда берди.
Трамп 2017—2020 йилларда АҚШ президенти бўлган. 2020 йил январида у амалдаги президент Жо Байденга лавозимини бўшатиб берган. Трамп ўз мағлубиятини тан олмаган ва сайлов натижаларини суд орқали бекор қилмоқчи бўлган. Бироқ АҚШ Олий суди собиқ президентнинг овоз бериш якунларини қайта кўриб чиқиш ҳақидаги даъвосини рад этган.
Байден октябрь бошида 2024 йилги президент сайловида Трампни яна мағлуб этишига ишонишини айтганди. Шу билан бирга, амалдаги давлат раҳбари сайловда қатнашиш ҳақида қарор қабул қилганича йўқ, бироқ буни Конгрессга сайловлардан кейин ҳал қилишини айтган.
Изоҳ (0)