Ijtimoiy tarmoqlarda o‘qituvchilar tomonidan hududdagi xonadonlarda yashovchi maktab yoshidagi bolalar haqida ma’lumotlar yig‘ilayotgani haqida xabar tarqalgach, Mass-media fondi Vasiylik kengashi raisi o‘rinbosari Saida Mirziyoyeva holat yuzasidan o‘z fikrlarini bildirgan va barcha mas’ullardan o‘qituvchilarni dars berishdan boshqa barcha vazifalardan ozod qilishini so‘ragan edi. “Menimcha” ko‘rsatuvida ushbu masalaga ham to‘xtalib o‘tildi.
Unda ta’kidlanishicha, Prezident adminstratsiyasi tomonidan Xalq ta’limi vazirligi hamda tegishli mutassaddilarga o‘qituvchilar zimmasiga yuklatilgan barcha ortiqcha vazifalarni inventarizatsiya qilish hamda ularni taqiqlash yuzasidan tegishli ko‘rsatma berildi.
Hammaning fikri bir yerda tutashadi: ta’lim biz uchun hayot-mamot masalasi. Ta’limning kuchi o‘qituvchining bilimi va fidoyiligida. Shuning uchun ham prezident eng ko‘p gapiradigan, ko‘p uchrashadigan kasb egalari – ustozlar bo‘lsa kerak.
Keyingi 5 yil uchun tanlab olingan ustuvor yo‘nalishlardan biri ham ta’lim. O‘qituvchi va o‘quvchi o‘rtasidagi eng katta bilim ko‘prigi esa bu darsliklar. O‘quv yili boshlanganiga 1 chorak o‘tgan bo‘lsa-da, hali hanuz ayrim maktablarda darsliklar yetishmovchiligi bilan bog‘liq muammolar borligini tarmoqlarda o‘qiyapmiz. Yana kunda kunora darsliklardagi misol va mashqlardagi xatoliklar haqida ham ota-onalar yozg‘irib qolishadi, — deyiladi unda.Ta’kidlanishicha, Prezident adminstratsiyasi huzurida tashkil etilgan ishchi guruh va Xalq ta’limi vazirligi darsliklarni yangilash, zamonaviy o‘quv metodikani ishlab chiqish bo‘yicha harakatlarni boshlagan.
Matematika butun dunyoda matematika, fizika yoki kimyo qonunlari butun dunyoda bir xil. Darsliklar sifati va o‘qitish metodikasi har xil. Velosipedni qayta ixtiro qilmasdan 1-4-sinf uchun eng ilg‘or xalqaro tajribalar yordamida o‘z milliy darsliklarimizni yaratamiz, 5-11-sinfning milliy mafkuramizga bog‘liq qismlari yani tarix, o‘zbek tili, adabiyot kabilarini o‘zimiz, tabiiy fanlar, ya’ni, fizika, ximiya, biologiya, anatomiya kabilarni esa eng zo‘r, tajribada sinalgan, katta natija beradiganini tayyorini olib o‘zimizga moslashtiramiz, deyishyapti. O‘tgan hafta davomida 1-4-sinf o‘quvchilari uchun yaratilayotgan o‘quv dasturlari va darsliklarni aprobatsiyadan o‘tkazish uchun tanlab olingan 14 ta maktab o‘qituvchilari maxsus tayyorlov kursini o‘tashdi, — deydi boshlovchi.
Yangi darsliklar tayyorlashda 4 K modeli asos qilib olingan bo‘lib, bular — kolloboratsiya, kommunikatsiya, kreativlik, kritika.
Biz avvallari bolalarning yozuviga ko‘proq e’tibor qaratganmiz, diktantlar yozdirganmiz. Yangi tajriba bilan esa bolalarning tanqidiy fikrlashi, o‘z fikrini erkin bayon eta olishiga ahamiyat beriladi. Deylik, 45 daqiqali darsda bolalar e’tiborini 10 daqiqagina o‘zimizga qarata olamiz, lekin yangi metodlarda o‘yinlar o‘ynatish, rasmlar chizdirishga alohida e’tibor berilmoqda, — deydi maxsus tayyorlov kursini o‘tagan o‘qituvchilardan biri.
Yana bir o‘qituvchi esa yangi darsliklar turli o‘zlashtirishga ega o‘quvchilar uchun moslashtirilgani, qaysidir o‘quvchi sinfdoshlaridan ortda qolib ketmasligiga e’tibor qaratilgani haqida gapirdi.
Shuningdek, fanlar bir-biriga shunday bog‘langanki, bir mavzuni ona tili fanida o‘tsak, matematika fani mavzusi ham shunga bevosita bog‘langan. Texnologiya fanida ham, tasviriy san’atda ham shu holat. Bu orqali o‘quvchilar berilayotgan axborotni to‘liq o‘zlashtira oladi. Shu jihatdan qulaylik tomonlari bizga juda ma’qul keldi, — deydi u.
Kurs yakunida ishtirokchi o‘qituvchilarga maxsus sertifikatlar topshirildi.
Izoh (0)