Ўзбекистоннинг 14 та ҳудудида 2023 йилдан бошлаб мактабларнинг 1—4-синфларида Финляндия экпертизасидан ўтган дарсликлар жорий қилиниши ҳақида хабар берилганди. Абдулла Авлоний номидаги миллий-тадқиқот институтида мазкур методикага асосланган мактаб таълимини ўқитиш истагидаги ўқитувчиларга семинар ташкил этилди, дея хабар бермоқда «Дарё» мухбири Абдуқаҳҳор Қосимов.
Малака ошириш курсларининг биринчи босқичи 4—9 ноябрь кунлари бўлиб ўтган. Унда хориж тажрибасида иштирок этиш истагини билдирган 139 нафар бошланғич синф ўқитувчисининг малакаси оширилган.
12—15 декабрь кунлари ўқув-семинарнинг иккинчи босқичи бўлиб ўтиши режалаштирилган. Дарс жараёнлари 15 нафар педагогни ўз ичига олувчи 4 гуруҳда ташкил этилган бўлиб, улар қуйидагиларни иборат:
- тасвирий санъат фани ўқитувчилари;
- технология фани ўқитувчилари;
- мусиқа маданияти фани ўқитувчилари;
- жисмоний тарбия фани ўқитувчилари.
Миллий-тадқиқот институти проректори Меҳринисо Пардаеванинг айтишича, бошланғич синф ўқувчиларига мўлжалланган электрон дарслик ва дастурлар, болаларни муаммони ҳал этиш ва зарур хулосага келишга ундовчи турли ўйин шаклидаги методик ишлар мазкур халқаро таълим йўналишининг асосини ташкил этади.
Халқаро тажрибалар ўзини оқлаган, яхши эканини исботлаган методикалардир. Тадқиқотлар давомида улар бизнинг миллий қадриятларимиз, менталитетимизга мос равишда такомиллаштирилиб, кейин жорий этилади. Нега айнан Финляндия тажрибаси? Чунки мана шу ўқитиш усули турли баҳолаш рейтингларида юқори ўринларни эгаллаган, — дейди Меҳринисо Пардаева.Унинг маълум қилишича, мазкур тажриба 2023/2024-ўқув йилидан бошлаб жорий этилади.
Агар икки чорак давомида халқаро тажриба асосида яратилган дарсликлар ўзини оқласа, у янги ўқув йилидан бошлаб оммавий равишда барча мактабларда қўлланади. Агар қайсидир жиҳатларда такомиллаштириш эҳтиёжи туғилса ёки бирор методикадан воз кечиш зарурати пайдо бўлса, тажриба-синов жараёнида аниқлик киритилади, — дейди институт проректори.Мазкур тажрибада иштирок этган Термиз шаҳридаги 12-мактаб директори Малоҳат Холиеванинг сўзларига кўра, бу амалиёт Ўзбекистоннинг 30 йиллик таълим тизимида камчилик борлиги учун эмас, аксинча, янгилик, хориж тажрибаси кўпроқ самара бериши мумкин экани туфайли амалиётда қўлланиши режалаштирилган.
Фин таълим дастурида шундай эканки, табиат фанида лайлак мавзуси ўтилаётган бўлса, она тили фани ҳам лайлак атрофига қурилади, гаплар шу бўйича тузилади. Математикада мисоллар ишлашда, чизмачиликда расм чизишда, технология фанида буюмлар ясашда ҳам лайлак объектидан фойдаланилади. Бола лайлак мавзусини тўлиқ, ҳар томонлама ўрганади, — дея фикрларини изоҳлаган Малоҳат Холиева.Мактаб директорининг қўшимча қилишича, янги методика болалардаги ижодкорлик қобилиятларини шакллантириб, ўзгача фикрлашга ўргатади.
Ҳозирги таълимда ўқувчига китобда бор нарса ўргатилади, шу китоб бўйича уйга вазифа берилади, бола ҳам шу бўйича ўрганади. Фин таълимидаги дарс жараёнида эса боланинг кўпроқ мантиқий фикрлаши, ижодкорлигига эътибор берилади, — дейди у.Мавзуга доир:
- Ўзбекистон ўз таълим тизимида нега айнан Финляндия усулидан фойдаланмоқчи?
- Дарсликларни янгилаш жараёни: махсус тайёрлов курсини ўтаган ўқитувчилар қандай фикрда? (видео)
- «Тасаввур қилинг, 10 йилдан кейин қандай болалар чиқади мактаблардан». Шавкат Мирзиёев таълимга Финляндия тажрибаси жорий этилиши ҳақида
Изоҳ (0)