Noyabr oyi o‘rtalarida Tibbiy-ijtimoiy xizmatlarni rivojlantirish agentligi tomonidan Tovar-xomashyo birjasiga 737 million so‘mlik platforma yaratish bo‘yicha tender e’lon qilingan edi. Unda bir nechta IT kompaniyalari ishtirok etgan va g‘olib kompaniya aniqlangan. Tenderni yutib olgan kompaniya agentlik tomonidan qo‘ygan texnik shartlarni 700 million so‘mga 15 kun muddat ichida bajarib berishni o‘z zimmasiga olgan.
Kam muddatda va katta mablag‘ evaziga yaratilayotgan platforma aytilgan summaga arziydimi va u nimasi bilan o‘ziga xos bo‘ladi? “Daryo” muxbiri ushbu savollar yuzasidan Tibbiy-ijtimoiy xizmatlarni rivojlantirish agentligining Axborot-kommunikatsiya texnologiyalari bo‘limi boshlig‘i Hamza O‘razmetovdan izoh oldi.
Prezident Shavkat Mirziyoyevning mart oyida qabul qilingan “Oila va xotin-qizlarni tizimli qo‘llab-quvvatlashga doir ishlarni yanada jadallashtirish chora-tadbirlari to‘g‘risida”gi farmonida nogironligi bo‘lgan shaxslar tomonidan tibbiy ijtimoiy yordam ko‘rsatish bo‘yicha davlat organlariga onlayn videoaloqa tizimi orqali murojaat qilish platformasini yaratish ko‘zda tutilgan.
Hamza O‘razmetovning aytishicha, farmonda nazarda tutilgan platformani ishlab chiqish uchun avgust oyidan ishga kirishilgan.
“Agentlikning imkoniyatidan kelib chiqqan holda 14-noyabr kuni platformani yaratish uchun 737 million so‘m evaziga tender e’lon qilingan. Avval o‘rnatilgan tartib bo‘yicha platformaning taxminiy narxini aniqlash maqsadida bir nechta IT kompaniyalariga texnik shartlarimizni yubordik. Ular ko‘rsatgan narx balandroq bo‘lsa-da, agentlikdagi mavjud mablag‘dan kelib chiqqan holatda e’lon berishimizga to‘g‘ri keldi. Qaysi IT kompaniyalarda biz talab qilgan imkoniyati bo‘lsa tenderda qatnashdi va ular orasidan bittasi g‘olib bo‘ldi”, — dedi Hamza O‘razmetov
Agentlik mas’ul xodimning ta’kidlashicha, g‘olib bo‘lgan kompaniyaga 3 ta tizim yaratib berish sharti qo‘yilgan va bu ishni bajarish uchun 15 kun muddat berilgan.
“Platformaning birinchi qismida mobil ilova yaratiladi. Ilovadan nogironligi bo‘lgan shaxslar ro‘yxatdan o‘tishi, video, foto va matn ko‘rinishida murojjat yollash imkoniyati beriladi. Shuningdek, murojaat qiluvchi o‘z manzilini ilovaning o‘zidan tanlagan holda ko‘rsatish imkoniyati bo‘ladi. Ikkinchi qismida esa platformadan 61 ta vazirlik va idoralarga alohida bo‘lib ajratiladi va ular murojaatlarni tegishliligi bo‘yicha javob berishlari mumkin bo‘ladi”, — dedi u.
Qo‘shimcha qilinishicha, g‘olib kompaniyaga uchinchi ish sifatida Brayl alifbosi va imo-ishora tilini o‘rganish istagidagilarni ro‘yxatga olish va ularni Xalq ta’limi hamda Bandlik va mehnat munosabatlari vazirligiga yo‘naltiruvchi tizim ishlab chiqish yuklatilgan.
Yuqorida sanab o‘tilgan 3 ta texnik shartlarni g‘olib kompaniya 700 million so‘m evaziga 15 kun muddatda tugallashi bo‘yicha agentlik ikki tomonlama shartnoma imzolangan. Demak, 2022-yilning so‘ngiga qadar platforma ishga tushishi kerak.
Izoh (0)