Serbiya prezidenti Kosovo bilan keskinlik tufayli 11-dekabr faoliyatidagi eng og‘ir kun bo‘lganini aytdi

Serbiya va Kosovo o‘rtasidagi mojaro avj olgan bir paytda Serbiya prezidenti Aleksandr Vuchich 11-dekabrni mamlakat rahbarligi faoliyatidagi eng og‘ir kun deb atadi. U serblarni tinchlik saqlashga va provokatsiyalarga berilmaslikka chaqirdi.

“Xalqimiz og‘ir kechani o‘tkazmoqda va men ular bilan birga bo‘lishim kerak. Bizda Kosovo uchun NATO kuchlaridan hech qanday zo‘ravonlik bo‘lmasligi haqida kafolat bor. Biz faqat mamlakatimizni himoya qilish uchun muayyan choralar ko‘rdik”, — dedi Vuchich 11-dekabr kuni kechqurungi bayonotida.

U, shuningdek, AQSHning Belgrad va Prishtinadagi elchixonalari qo‘shma bayonotiga munosabat bildirdi, unda Vashington Kosovo shimolidagi noqonuniy barrikadalarni buzib tashlashga va zo‘ravonlik tahdidlarini to‘xtatishga chaqirgandi. Vuchichning so‘zlariga ko‘ra, u bunday “xabar”ni kutgan, ammo bundan hafsalasi pir bo‘lgan. Serbiya rahbarining aytishicha, Kosovo Qo‘shma Shtatlarning “farzandi” va “ular uni himoya qiladi”.

“Gap Kosovodagi serb muammosiga barham berishga urinish haqida ketmoqda. Bu muammoda Kosovo bosh vaziri Albin Kurti, Prishtina hukumati va xalqaro hamjamiyatning ishtiroki bor”, — dedi Vuchich.

10-dekabr kuni, asosan, serblar istiqomat qiladigan Kosovo shimolida barrikadalar paydo bo‘la boshladi, bundan tashqari, aholi chegara punktlariga boradigan yo‘llarni to‘sib qo‘ydi. To‘polonga asli serb bo‘lgan kosovolik politsiyachi Deyan Pantichning hibsga olinishi sabab bo‘lgan. Bir necha kun oldin u va uning ayrim hamkasblari Kosovo politsiyasida xizmatni davom ettirishdan bosh tortgan va Kosovska-Mitrovitsa shahridagi lavozimlarini tark etgandi.

Qisman tan olingan Kosovo hukumati 11-dekabr kuni NATOning Kosovodagi kontingenti qo‘mondonligiga respublika shimolidagi barrikadalarni olib tashlash talabi bilan murojaat qildi. Kurti, kechgacha javobni kutishi, talab rad etilgan taqdirda barrikadalarni Kosovo xavfsizlik kuchlari demontaj qilishi mumkinligini ta’kidladi. Shundan so‘ng Vuchich Serbiya Xavfsizlik kengashi yig‘ilishini chaqirdi.

Mavzuga doir: Serbiya Kosovoga armiya va politsiya kuchlarini joylashtirish uchun NATOdan ruxsat so‘ramoqchi