Agar Gretsiya AQSHdan olingan qurollarni Dodekanes arxipelagiga yuborsa, bu Anqaraning Tayfun ballistik raketasi bilan javob qaytarishiga sabab bo‘ladi, deya ogohlantirdi Turkiya prezidenti Rajab Toyyib Erdo‘g‘on.
“Hozir biz o‘z raketalarimizni ishlab chiqarishni boshlaganmiz, bu greklarni qo‘rqitmoqda. Tayfun desangiz, greklar qo‘rqib ketadi va ‘U Afinaga zarba beradi’, deydi. Ha, zarba beradi, agar siz tinchimasangiz, orollar uchun Amerikadan nimadir sotib olishga urinsangiz. Turkiya kabi davlat biror chora ko‘rishi kerak”, — dedi Turkiya prezidenti.
Tayfun raketasi Turkiya harbiylari tomonidan oktabr oyida sinovdan o‘tkazilgan edi. Turkiya matbuoti manbalarining qayd etishicha, Tayfun raketalari Turkiyada bir necha yil davomida yashirin ravishda ishlab chiqilgan. Mamlakat rasmiylarining ta’kidlashicha, raketa 561 km masofani 456 soniyada bosib o‘ta oladi.
Erdo‘g‘onning tahdidlarida gap Dodekanes orollari guruhi (boshqa nomi Janubiy Sporadalar) haqida ketmoqda. Arxipelagga 15 ta katta va 150 ta kichik orollar, jumladan, Rodos kiradi, ularning umumiy maydoni 2670 kvadrat kilometr. Orollar Turkiyaning janubi-g‘arbiy qismida joylashgan bo‘lib, ba’zi joylarda Gretsiya va Turkiya hududlari orasidagi masofa 5 kilometrga ham yetmaydi.
Orollar uzoq vaqt davomida Usmonli imperiyasi, 1912—1947-yillarda esa Italiya tomonidan nazorat qilingan — bu 1923-yilda Lozanna shartnomasi bilan tasdiqlangan. Ikkinchi Jahon urushidan so‘ng, Buyuk Britaniya va Gretsiya oldidagi orollarni nazorat qilish Parij tinchlik shartnomasiga binoan, Gretsiyaga topshirildi.
Turkiya da’vo qilishicha, arxipelagning qurolsizlantirilgan maqomiga qaramay, Gretsiya orollarda harbiy salohiyatini oshirmoqda. “Agar Gretsiya qurolsizlantirilgan maqomni buzishni to‘xtatmasa, orollar suvereniteti masalasi muhokamaga qo‘yiladi”, — deya ogohlantirgan Turkiya tashqi ishlar vaziri Mavlut Chavosho‘g‘lu iyun oyida. Gretsiyaning ta’kidlashicha, Anqara orollarda qurolli kuchlarning bo‘lishi haqidagi shartnomalarni noto‘g‘ri talqin qilmoqda va bu Afina Turkiyaning dushmanlik harakatlari tufayli o‘zini himoya qilish uchun qonuniy asoslarga ega ekanini ko‘rsatmoqda.
Izoh (0)