Peruda zudlik bilan prezident saylovini o‘tkazish talabi bilan ommaviy noroziliklar davom etmoqda. Andauaylas shahrida namoyishchilar aeroportni egallab olib, bir nechta terminallarga o‘t qo‘ydi. Noroziliklar chog‘ida bir kishi halok bo‘lib, kamida o‘n kishi jabrlandi.
Namoyishlar tufayli, aeroportni yopishga to‘g‘ri keldi, deb xabar berdi uni boshqaruvchi Coprac davlat kompaniyasi. Uning ma’lumotlariga ko‘ra, aksiya ishtirokchilari peredatchiklar zaliga va yonilg‘i omboriga o‘t qo‘yib, aerovokzalni qurshab olgan, u yerda esa Peru politsiyasining 50 nafar xodimi va Coprac ishchilari bo‘lib turibdi. “Garovda qolganlar” politsiyadan yordam so‘radi, deyiladi kompaniya xabarida.
Peru politsiyasi ma’lum qilishicha, aeroportda noroziliklar chog‘ida namoyishchilardan biri halok bo‘lgan. Shuningdek, huquq-tartibot organlarining bir xodimi yaralangan. “Tartib va jamoat xotirjamligini kafolatlash uchun qo‘mondonlik aeroportga qo‘shimcha kuch yubordi, deyiladi politsiya xabarida.
Namoyishlar Lima, Apurimak, Kaxamarka, Arekipa, Lambayeke, Ika shaharlarida davom etmoqda. Mahalliy OAVlar ma’lumotlariga ko‘ra, noroziliklar oqibatida kamida o‘n kishi jabrlangan.
Tartibsizliklar 7-dekabr kuni Peru parlamenti prezident Pedro Kastilyoga nisbatan impichment e’lon qilganidan keyin boshlandi. Undan bir necha soat avval Kastilyo parlamentni tarqatib yuborib, mamlakatda komendantlik soatini joriy etishni buyurgandi, biroq harbiylar unga bo‘ysunishdan bosh tortdi. U isyonda va o‘z vakolatlarini suiiste’mol qilishda ayblanib, qo‘lga olindi. Uning lavozimi vitse-prezident Dina Boluartega topshirildi. 8-dekabr kuni u qasamyod qabul qilib, Peruning birinchi ayol prezidentiga aylandi. U o‘z lavozimida 2026-yil 26-iyulgacha qolishi taxmin qilinmoqda. 10-dekabr kuni u hukumatning yangi tarkibini e’lon qildi. Prokuratura Pedro Kastilyo uchun toksikologik ekspertiza tayinladi, ammo u ekspertizadan o‘tishdan bosh tortdi.
Izoh (0)