Moskvadagi avtobuslardan o‘zbek, qirg‘iz va tojik tillarida Rossiya fuqaroligi evaziga armiyada xizmat qilish haqidagi murojaatlar yozilgan chaqiruvlar olib tashlandi. Bu haqda “TASS” xabar berdi.
Moskvadagi avtobuslar va elektrobuslar uchun mas’ul bo‘lgan “Mosgortrans” davlat unitar korxonasi e’lonlar haqiqatan ham ko‘rsatilganini tasdiqladi, ammo allaqachon olib tashlanganini qo‘shimcha qildi. Murojaatlar “Saxarova” migratsiya markazi rahbariyatining iltimosiga ko‘ra MTs1, MTs2 va MTs3 yo‘nalishlaridagi avtobuslarda ikki oy muddatga joylashtirilgan.
“Hozirda xabarlar olib tashlandi”, — deyiladi “Mosgortrans” matbuot xizmati xabarida.
O‘z navbatida, O‘zbekiston Tashqi mehnat migratsiyasi agentligi Rossiyada vaqtincha mehnat faoliyatini amalga oshirayotgan O‘zbekiston fuqarolarini ogohlikka chaqirgandi.
“Rossiya Federatsiyasi hududida vaqtincha mehnat faoliyatini amalga oshirayotgan O‘zbekiston fuqarolaridan Rossiya va Ukraina o‘rtasidagi ziddiyatli hududlarga jalb qilish haqidagi da’vatlarga ergashmaslikni, ziddiyatli hududlarga bormaslikni va harbiy harakatlarda ishtirok etmaslikni so‘raymiz”, — deyiladi agentlik xabarida.
Eslatib o‘tamiz, O‘zbekiston Jinoyat kodeksining 154-1-moddasida chet davlatlarning harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga yollanish 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish bilan jazolanishi ko‘zda tutilgan.
Izoh (0)