BAAda musulmon bo‘lmaganlar uchun yangi oilaviy qonun chiqarildi

Birlashgan Arab Amirliklari (BAA) musulmon bo‘lmagan fuqarolarning shaxsiy maqomi to‘g‘risida yangi qonun chiqardi. Bu haqda Al-Arabia xabar berdi.

Yangi qonun 2023-yil 1-fevraldan kuchga kiradi, u mamlakatning qonunchilik tizimini rivojlantirish, bag‘rikenglik, demografik xilma-xillik uchun davlat sifatidagi yetakchilikni mustahkamlashga qaratilgan sa’y-harakatlarning bir qismidir.

Qonunda nikoh tuzish shartlari va hujjatlashtirish ishlarini vakolatli sudlar tartibga solishi belgilangan. Bundan tashqari mazkur qonun ajralish, meros, vasiyatnomalar va otalikni tasdiqlovchi hujjatlarga nisbatan qo‘llaniladi,

“Ushbu qonunga ko‘ra, ayollarga guvohlik berish, meros olish, ajrashish uchun ariza berish va 18 yoshga to‘lgunga qadar bolalarga birgalikda vasiylik qilishda teng huquqlar berilgan. Bolalar ota-onalari o‘rtasida tanlov qilish huquqiga ega bo‘ladi. Bu ayollarning suddagi ko‘rsatuvi erkaklarniki bilan teng bo‘lishini anglatadi” deyiladi xabarda.

Qonunda ajralib turadigan ba’zi o‘zgarishlar hijriy taqvim o‘rniga Grigoriyning qabul qilinishidir. Shuningdek, endilikda aliment to‘lash bir necha omillar, jumladan, turmush qurgan yil, har ikkala turmush o‘rtog‘ining moddiy ahvoli, ajralish uchun erning javobgarligi darajasiga qarab hisoblab chiqiladi va qaror qabul qilinadi.

Ma‘lumot o‘rnida, Qatar va saudiyaliklarning yarmidan ko‘pi o‘z qarindoshlariga turmushga chiqadi. BAAda ulush bundan ham yuqori. Shunday qilish oila ichidagi qarindoshlik tarmoqlarini va mulkni mahkam ushlab turadi. Konservativ uy xo‘jaliklaridagi qizlarga o‘z oilasidan tashqarida o‘g‘il bolalar bilan birga yurishga yo‘l qo‘yilmasligi mumkin.