Germaniya kansleri Olaf Shols Rossiya prezidenti Vladimir Putinning urushdan ko‘zlagan maqsadi haqida gapirdi. Bu haqda “Yevropeyskaya pravda” xabar berdi.
Kansler Putin bilan Ukrainadagi urushni bir necha bor telefon orqali muhokama qilgani, ularning so‘nggi suhbati bir soat davom etgani va 2-dekabr kuni bo‘lib o‘tganini aytdi. Siyosatchi Putinning pozitsiyasi o‘zgarishsiz qolayotganini qo‘shimcha qildi.
“Men har gal Putin bilan gaplashsam, u juda aniq nimanidir zabt etish haqida gapiradi. U Ukraina hududining bir qismini kuch bilan egallab olmoqchi, xolos”, — deydi Shols.
Shu bilan birga, u Rossiya armiyasidagi yo‘qotishlar Putinni to‘xtata olmasligini qayd etdi.
“Biz qancha rossiyalik harbiy halok bo‘lganini aniq bilmaymiz. Lekin bu son 100 mingni tashkil qilishi mumkin”, — deydi kansler.
Uning ta’kidlashicha, Rossiya rahbariyati avval ham, masalan, Suriya yoki Chechenistonda “butun bir mamlakatni yer yuzidan qirib tashlagan”da qo‘pol yondashuvni qo‘llagan.
Olaf Shols barcha kelishmovchiliklarga qaramay, Ukraina bilan bog‘liq o‘zgarishlar bor-yo‘qligini tekshirish uchun Putin bilan gaplashishi kerakligini xulosa qilgan.
Mavzuga doir: “Ukraina urushining kuchayishiga tayyor bo‘lish kerak” — Germaniya kansleri
Izoh (0)