Rossiyaga keluvchi xorijliklar orasida mamlakat qurolli kuchlari safida xizmat qilishga bo‘lgan qiziqish ortib borayotgani ma’lum qilindi. Bu haqda Rossiya migrantlar federatsiyasi prezidenti Vadim Kojenov “Govorit Moskva”ga bergan intervyusida aytdi.
Ma‘lum qilinishicha, bunga xorijliklar uchun yaratilayotgan sharoitlar, jumladan, ular Rossiya fuqaroligini soddalashtirilgan tartibda olishi mumkinligi sabab bo‘lmoqda.
“Qurolli kuchlar safida xizmat qilish haqidagi axborot ommaviy axborot vositalarida tarqalgach, qiziqish ortdi. Eng qizg‘in pallada kuniga 10-15 kishi qo‘ng‘iroq qilib, qanday ro‘yxatdan o‘tishni so‘radi. Tarqatgan videomiz 40 ming marta ko‘rildi, unga talab yuqori edi.
Oxir-oqibat qancha odam shartnoma tuzib, xizmat qila boshlaganini bilmayman, lekin bunday odamlar bor. Taklif juda yaxshi — maosh yuqori va fuqarolikni soddalashtirilgan tarzda topshirish imkoniyati mavjud. Bu haqiqatan ham xorijliklar uchun juda zarur bo‘lgan imkoniyat”, — degan Kojenov.
Eslatib o‘tamiz, O‘zbekiston Jinoyat kodeksining 154-1-moddasida chet davlatlarning harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga yollanish 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish bilan jazolanishi ko‘zda tutilgan.
Izoh (0)